महोत्तरीमा अर्धनग्न अवस्थामा एक युवकको शव फेला परेको छ।
सोनमा गाउँपालिका– २ बस्ने २९ वर्षीय ज्ञानेन्द्र भनिने ज्ञानु यादवको शव गहुँ खेतमा फेला परेको प्रहरीले जनाएको छ।
सोमबार साँझदेखि हराइरहेका उनी मरछर टोलदेखि सोनमा गाउँ जाने बाटोमा गहुँ खेतमा मृत अवस्थामा भेटिएको जिल्ला प्रहरी कार्यालय महोत्तरीका प्रहरी निरीक्षक नन्दकुमार चौहानले बताए।
‘सोमबार साँझ उनी बजारमा देखिएका थिए। त्यहाँ खानपिन गरे, तर राति घर पुगेनन्। आज बिहान गहुँ खेतमा घोप्टो परेको अवस्थामा उनको शव स्थानीयले देखेपछि प्रहरीलाई खबर गरेछन्। घटनाको प्रकृति हेर्दा हत्या भएको देखिन्छ। उनको जिउभरी निलडाम छ,’ उनले भने।
गम्छाले घाँटी थिचेर उनको हत्या गरिएको हुनसक्ने प्रहरीको अनुमान छ।
घटनास्थलमा तालिम प्राप्त कुकुर टोलीसमेत ल्याएर अनुसन्धान अगाडि बढाएको छ। शव पोष्टमर्टमका लागि प्रादेशिक अस्पताल जलेश्वरमा राखिएको छ। घटनाबारे थप अनुसन्धान भइरहेको प्रहरीले जनाएको छ।
