ओखलढुंगामा एक पुरूषको कुटपिट गरी हत्या गरेको आरोपमा प्रहरीले एक जना वृद्धलाई पक्राउ गरेको छ।
चिसङखुगढी गाउँपालिका-१ कुइभिर बस्ने ४६ वर्षीय रामकुमार राईको हत्या भएको हो।
उनको हत्या गरेको आरोपमा छिमेकी ७० वर्षीय टुकराज राईलाई पक्राउ गरेको जिल्ला प्रहरी कार्यालयका डिएसपी कृष्ण खड्काले जानकारी दिए।
उनका अनुसार माघ २ गते अपराह्नमा घटना भएको हो। छिमेकी समेत रहेका उनीहरूले मापसे गरेका थिए।
मापसे गर्नेक्रममा सामान्य विवादमा टुकराजले रामकुमारमाथि कुटपिट गरेको हो।
कुटपिट गरी घाइते भएका रामकुमारलाई त्यहीँ छाडेर टुकराज फरार भएका थिए।
पछि मात्रै रामकुमारलाई अरू स्थानीयले फेला पारेर सामुदायिक अस्पतालमा पठाइएको थियो।
उपचारको क्रममा उनको मृत्यु भएको हो।
प्रहरीले त्यसपछि खोजी गरी आइतबार टुकराजलाई पक्राउ गरेको हो। ओखलढुंगा जिल्ला अदालतबाट कर्तव्य ज्यान सम्बन्धी कसुरमा अनुसन्धानका लागि म्याद थप गरेको छ।
