रूकुम पश्चिममा मध्यराति भएको मोटरसाइकल दुर्घटनामा परी एक युवकको मृत्यु भएको छ।
चौरजहारी नगरपालिका–१ लामिछाने गाउँका ३२ वर्षीय चिरन्जीवी लामिछानेको आइतबार बिहान २ बजेतिर घर नजिकै भएको मोटरसाइकल दुर्घटनामा परी मृत्यु भएको जिल्ला प्रहरी प्रमुख डिएसपी प्रमेश विष्टले सेतोपाटीलाई बताए।
आफन्तको बिहे खान गएका लामिछाने चौरजहारी बजारबाट पाँच मिनेट टाढाको घरतर्फ जाने क्रममा बिहान २ बजेतिर दुर्घटनामा परेका थिए। लामिछानेले हाँकेको कर्णाली प्रदेश ०३–००१ प ०४७३ नम्बरको मोटरसाइकल अनियन्त्रित भई भित्तामा ठोक्किएको थियो।
मृतक लामिछाने सँगसँगै अर्का एक आफन्त पछिपछि मोटरसाइकलमा सवार थिए। लामिछाने दुर्घटनामा परेको खबर तत्कालै अर्का युवकले प्रहरीलाई फोन गरी सूचना दिएका थिए।
तत्कालै प्रहरी घटनास्थल पुगेर लामिछानेको उद्धार गरी चौरजहारी अस्पताल पुर्याएको थियो। चिकित्सकले चेकका क्रममा बिहान साढे २ बजेतिर लामिछानेलाई मृत घोषणा गरेका थिए।
मृतक लामिछाने कर्णाली प्रदेश मार्सल आर्ट्स महासंघ तदर्थ समितिको सदस्य पनि रहेको एक जना आफन्तले जानकारी दिएका छन्।
