चितवन प्रहरीले रवि लामिछाने सहितका ३१ जना व्यक्ति र ७ कम्पनीविरूद्ध अनुसन्धान गरेर तयार पारेको पूरक प्रतिवेदन सरकारी वकिलको कार्यालयमा पेस गरेको छ।
सहारा चितवन बहुउद्देश्यीय सहकारी संस्थाको बचत रकम अपचलन गरेको जाहेरीमा अनुसन्धान गरेको प्रहरीले सरकारी वकिलको कार्यालयमा प्रतिवेदन बुझाएको जिल्ला प्रहरी कार्यालय चितवनका डिएसपी ज्ञानकुमार महतोले जानकारी दिए।
यो पनि: सक्कल फाइल आउन ढिलाइ भएपछि रूपन्देहीमा दर्ता हुन सकेन रवि लामिछानेको मुद्दा
सहारा सहकारीबाट गोर्खा मिडिया नेटवर्क प्रालिमा १० करोड ८० लाख १८ हजार १५१ लाख रुपैयाँ गएको देखिएको छ। लामिछाने र छविलाल जोशी गोर्खा मिडियाका सञ्चालक हुन्। अन्य जिबी राईले सञ्चालन गरेका विभिन्न कम्पनी, तिनका सञ्चालक तथा सेयरधनी हुन्।
सहारा चितवन सहकारीबाट नेचर हर्ब्स इन्टरनेसनल प्रालिमा ९ करोड ७३ लाख ८१ हजार ५९७, जिबी ग्रुप अफ कम्पनीमा ९ करोड २७ लाख ५० हजार ८५४ र स्प्रिङ उड रियल स्टेट ६ करोड ८१ लाख ८८ हजार ७०३ र नेचर नेस्ट प्रालिमा ६ करोड ५१ लाख १० हजार ३२२ गरेर ४३ करोड १४ लाख ४९ हजार ९२७ रुपैयाँ गएको भन्दै गत मंसिर ५ गते पीडितहरूले प्रहरीमा जाहेरी दिएका थिए।
यसअघि गत असोज ८ गते पनि प्रहरीले सहारा सहकारीका पीडितले दिएको जाहेरीको आधारमा अनुसन्धान गरी सरकारी वकिलको कार्यालयमा प्रतिवेदन बुझाएको थियो। सरकारी वकिलको कार्यालयले जिबी राईलगायत १७ जनाविरूद्ध सहकारी संस्थाको बचत हिनामिना गरेको अभियोगमा चितवन जिल्ला अदालतमा मुद्दा दायर गरेको थियो।
सोही मितिमा जिल्ला सरकारी वकिलको कार्यालय चितवनले सहारा चितवन बहुउद्देश्यीय सहकारी संस्थाबाट गोर्खा मिडियामा गएको रकमबारे थप अनुसन्धान गर्न प्रहरीलाई निर्देशन दिएको थियो।
सहकारीबाट रकम गएको भनिएको गोर्खा मिडियाको ग्लोबल आइएमई बैंकको खातामा जम्मा भएको ४७ करोड रुपैयाँ बराबरको कारोबार के कसरी, को–कोसँग भएको हो सोको विवरण प्राप्त नदेखिएकाले सो सम्बन्धमा थप अनुसन्धान गर्न सरकारी वकिलको कार्यालयले चितवन प्रहरीलाई निर्देशन दिएको थियो।
अदालतमा राईसहित सागर केसी, वीरबहादुर रानाभाट, हेमन्त रानाभाट, हेमन्त अधिकारी, छत्रमणि भट्टराई, भुपेन्द्र राई, अनन्तबाबु राई, आशिष आनन्द, देबेन्द्रबाबु राई, दिनेश रोका, दिपा न्यौपाने, शिवप्रसाद आचार्य, मनोज गुरूङ, तीर्थराज लामिछाने, कुमार रम्तेल, शरण विश्वकर्मा र थमन भन्ने थानबहादुर बुढा मगर उपर ठगीसम्बन्धी कसुरमा मुद्दा यसअघि नै दर्ता भइसकेको छ।
यो सहकारीका कुल बचतकर्ता ६ हजार ३ सय ३४ छन्। कुल बचत रकम ५२ करोड ३२ लाख ८५ हजार ३ सय ८ रूपैयाँ रहेको अनुसन्धान प्रतिवेदनमा उल्लेख छ।
पहिले सहारा सहकारीका ४ सय ४६ जना बचतकर्ताले प्रहरीमा दिएको उजुरीका आधारमा प्रहरीले अनुसन्धान गरेर बुझाएको प्रतिवेदनका आधारमा अदालतमा मुद्दा दायर गरिएको थियो। प्रहरीले त्योसहित थप १० निवेदनको आधार पूरक प्रतिवेदन तयार पारेको हो। उनीहरूको ३८ करोड ९ लाख ७९ हजार १७७ रुपैयाँ बचत छ।
अनुसन्धानबाट सहारा सहकारीको कुल दायित्व पुँजी ६५ करोड १६ लाख ७१ हजार ७१२ रुपैयाँ देखिन्छ। सहकारीले कर्जा लगानी गरी फिर्ता लिन बाँकी रकम ५६ करोड २२ लाख ५० हजार ११५ रुपैयाँ देखिएको छ। कम्पनीमा लगानी गरिएको ऋण ४३ करोड १४ लाख ४९ हजार ९२७ र प्रतिवादीमा लगानी भएको ऋण ५ करोड ७९ लाख ८३ हजार ८७३ रुपैयाँ देखिएको डिएसपी महतोले बताए। सहकारीले ११८ जना वचतकर्तामा ७ करोड २८ लाख १६ हजार ३१२ रुपैयाँ ऋण लगानी गरेको थियो।
सहारा चितवन सहकारीका एक मुख्य र दुई शाखा कार्यालयका थिए।
प्रहरीले प्रतिवादीहरूलाई मुलुकी अपराध संहिता २०७४ दफा २४९ को उपदफा १ र २ विपरीत कसुरमा दफा २४९ को उपदफा ३ (ग) बमोजिम सजाय माग दाबी गरेको डिएसपी महतोले जानकारी दिए। साथै संगठित अपराध निवारण ऐन २०७० को दफा ३(१) (२) ३ (क) र ५ बमोजिम दफा ९ (क) र (ग) बमोजिम सजाय माग गरिएको छ।
जिल्ला न्यायाधिवक्ता शान्तिराज लुइँटेलले प्रहरीले बुझाएको प्रतिवेदन अध्ययन गर्न केही दिन लाग्ने बताए।
यो पनि: अदालतले रवि लामिछानेलाई धरौटीमा छाड्दा रास्वपामा खुसीयाली देखिनुको अर्थ!
-ink-1724409786.jpeg)
