झापामा गैंडाको खाग र लागुऔषध सहित एक जना पक्राउ परेका छन्।
बुधबार दिउँसो साढे ३ बजे मेचीनगर नगरपालिका-६ काकडभिट्टाबाट एक जनालाई पक्राउ गरेको जिल्ला प्रहरी कार्यालय झापाका डिएसपी कृष्ण चन्दले जानकारी दिए।
प्रहरीले एउटा गेस्ट हाउसको कोठा नम्बर १०२ बाट भारतको पश्चिम बंगालका नारायण रामधामललाई पक्राउ गरेको हो।
उनले लागुऔषध ल्याएर राखेको भन्ने सूचना प्रहरी पाएको थियो। सूचनाको आधारमा जिल्ला प्रहरी कार्यालय र इलाका प्रहरी कार्यालय काकडभिट्टाबाट टोली खटिएको थियो।
उक्त टोलीले कोठाभित्रबाट १८.६ इन्चको गोलाइ, ८.६ इन्चको उचाइ र एक किलो ७०० ग्रामको गैंडाको खाग बरामद गरेको हो।
उनीबाट २.८ ग्राम ब्राउन सुगर, १८ पत्ता ट्याबलेट लागुऔषध, मोबाइल फोन र डिजिटल तराजु पनि बरामद भएको हो।
