रूकुम पश्चिमको ठूलीभेरी नदीमा शव भेटिएको छ।
बुधबार बिहान सवा ८ बजेतिर जिल्लाको आठबिसकोट नगरपालिका ११ र १३ को सीमाना क्षेत्रमा पर्ने ठूलीभेरी नदीमा तैरिरहेको अवस्थामा एक पुरुषको शव फेला परेको रुकुम पश्चिम प्रहरीका प्रवक्ता प्रहरी निरीक्षक ऋषि पाठकले जानकारी दिए।
नदी किनारमा पानीमा तैरिरहेको अवस्थामा मानिसको शव देखेपछि स्थानीयले प्रहरीलाई सूचना दिएका थिए।
त्यो सूचनाको आधारमा इलाका प्रहरी कार्यालय आठबिसकोटबाट प्रहरी निरीक्षक गणेश खनाल नेतृत्वमा पुगेको प्रहरी टोलीले शव निकालेको थियो। शव सडेगलेको अवस्थामा फेला परेको प्रहरी प्रवक्ता पाठकले बताए।
शरीरमा कपडा नभएको अवस्थामा फेला परेको शवको पहिचान हुन बाँकी रहेको प्रहरीले बताएको छ। शवको पोष्टमर्टम गर्न जिल्ला अस्पताल सल्लेतर्फ पठाइएको प्रहरीले बताएको छ।
