जिल्ला प्रहरी परिसर काठमाडौंले स्वर्णलक्ष्मी बहुउद्देश्यीय सहकारी संस्थाको अनुसन्धान सकेर जिल्ला सरकारी वकिलको कार्यालय काठमाडौंमा प्रतिवेदन बुझाएको छ।
बिहीबार प्रहरीले ४४ जनालाई मुद्दा चलाउनुपर्ने* रायसहित सरकारी वकिलको कार्यालयमा प्रतिवेदन पेस भएको जिल्ला प्रहरी परिसर काठमाडौंका एसपी नवराज अधिकारीले जानकारी दिए।
उनका अनुसार प्रहरीको दुई जना परिसरको प्रहरी हिरासतमा, दुई जना कास्की प्रहरीको हिरासतमा र एक जना कारागारमा छन्। त्यसबाहेक ३९ जनाविरूद्ध मुद्दा चलाउन प्रहरीले राय दिएको हो। उनीहरू सबै जना गरी ४४ जनाविरूद्ध पक्राउ पुर्जी जारी भएको हो।
जिल्ला सरकारी वकिल कार्यालयका जिल्ला न्यायाधिवक्ता खडिन्द्रराज कटुवालका अनुसार प्रहरीले एक अर्ब १९ करोड ४९ लाख २१ हजार २७० रुपैयाँ बिगो मागदाबी गर्दै प्रतिवेदन बुझाएको छ।
‘प्रहरीले अहिले प्रतिवेदन बुझाएको छ, अब अध्ययन गरेर अभियोजन हुन्छ,’ उनले भने, ‘केही दिनमा मुद्दा दर्ता हुन्छ।’
संगठित अपराध र सहकारी बचत रकम अपचलनमा मुद्दा दायर गर्न प्रतिवेदन बुझाएको हो।
अहिले लेखा सदस्य सुनिता नेवा र कर्जा सदस्य कमल लामा मात्रै परिसरको हिरासतमा छन्। केही प्रतिवादीहरू कास्कीमा र अन्य फरार छन्।
राष्ट्रिय स्वतन्त्र पार्टीका सभापति रवि लामिछाने, जिबी राई, पूर्वडिआइजी छविलाल जोशी, कुमार रम्तेल लगायतविरूद्ध पनि मुद्दा चलाउनुपर्ने प्रहरीको राय छ।
न्यायाधिवक्ता कटुवालका अनुसार लामिछाने, जोशी, रम्तेल र राईविरूद्ध संयुक्त रूपमा ५ करोड ७८ लाख ९६ हजार ४८० बिगो मागदाबी भएको छ।
*यसअघि अन्यथा भइकोमा सच्याइएको -सम्पादक
