दम र क्रोनिक अब्स्ट्रक्टिव पल्मनरी डिजिज (सिओपिडी) जस्ता श्वासप्रश्वासका गम्भीर समस्याको उपचारमा ५० वर्षपछि नयाँ विकल्प पत्ता लागेको छ।
किङ्ग्स कलेज लण्डनका वैज्ञानिकहरूले गरेको परीक्षणमा बेन्रालीजुमाब भन्ने मोनोक्लोनल एन्टीबडी हाल प्रयोग हुँदै आएको स्टेरोएडभन्दा ३० प्रतिशत बढी प्रभावकारी पाइएको छ।
प्रयोगशालामा बनाइएको कुनै एक एन्टीबडीको क्लोनलाई मोनोक्लोनल एन्टीबडी भनिन्छ। लान्सेट रेस्पिरेटोरी मेडिसिन जर्नलमा गत हप्ता सो औषधीको परीक्षण सम्बन्धी प्रतिवेदन छापिए पछि श्वास-प्रश्वास सम्बन्धी रोगका विशेषज्ञले यसलाई गेम-चेन्जर ठानेको भनेर विभिन्न विदेशी मिडियाले लेखेका छन्।
गम्भीर खालको दमको समस्यामा बेन्रालीजुमाब कम मात्रामा दिइँदै आएको छ। परीक्षणले गार्हो परेको बेला बढी मात्रामा एक पटक मात्रै दिए पनि यसले प्रभावकारी काम गर्ने देखाएको छ।
हाल गाह्रो परेको बेला इन्हेलरले काम गरेन भने स्टेरोएडमात्रै दिने गरिएको छ।
करिब ५० वर्ष अघि देखि यस्तो गाह्रो परेका बिरामीलाई स्टेरोएड दिइने एक मात्रै विकल्प थियो। बेन्रालीजुमाबले फोक्सो सुनिने वा त्यसलाई खराब पार्ने इसिनोफिल भनिने सेतो रक्तकोषिकालाई निशाना बनाउँछ।
दमले गार्हो पार्ने आधाजस्तो घटना र सिओपिडीले गाह्रो पार्ने एक-तिहाइ जति घटनाहरू इसिनोफिलकै कारण हुने मानिन्छ। यसरी इसिनोफिलकै कारण गार्हो बनाएका बेला बेन्रालीजुमाबलको प्रयोग गरिए बिरामीको रोग प्रतिरोधात्मक क्षमतालाई केही कमजोर बनाएर बिरामीलाई राहत दिन्छ।
सो परीक्षणमा १५८ जना बिरामी सहभागी थिए। एक समूहलाई एक पटक बेन्रालीजुमाब र डमी ट्याब्लेट दिइएको थियो, अर्कोलाई पाँच दिनसम्म स्टेरोएड र डम्मी सुई र अर्कोलाई बेन्रालीजुमाब र स्टेरोएड दुवै दिइएको थियो।
त्यसको २८ दिन पछि हेर्दा बेन्रालीजुमाब दिइएकोमा खोकी लाग्ने, सास फेर्न अप्ठ्यारो हुने र खकारको समस्या कम देखिएको थियो।
डमी ट्याब्लेटसँग दिइएको होस् वा स्टेरोएडसँग, बेन्रालीजुमाब दिइएका बिरामीको अवस्था स्टेरोएड दिइएकाको भन्दा राम्रो पाइएको थियो।
त्यस्तै ९० दिन पछि पनि बेन्रालीजुमाब दिइएका मध्ये थोरैमा मात्रै समस्या फेरि देखिएको थियो। स्टेरोएड दिइएका मध्ये ७४% मा समस्या देखिएको थियो भने बेन्रालीजुमाब दिइएका ४५%मा मात्रै देखियो।
यसको मतलब बेन्रालीजुमाब प्रयोग गरेकाको जीवन कम कष्टकर थियो वा उनीहरूलाई गाह्रो भएर अस्पताल भर्ना गर्नुपर्ने वा मृत्यु हुने सम्भावना कम थियो।
परीक्षणका मुख्य खोजकर्ता डक्टर सन्जय रामाक्रिस्ननका अनुसार यो औषधीले दम र सिओपिडीका बिरामीका लागि ठूलो सम्भावना बोकेको छ।
‘विश्वमा तेस्रो सबैभन्दा बढी मृत्युहुने रोग सिओपिडी हो। तर यसको उपचार भने २०औं शताब्दीमै अड्किएको थियो। यी बिरामीहरूको समय सकिनु अघि हामीले यीनको जीवन जोगाउन नयाँ उपचारका विकल्प दिनु पर्छ,’ उनले भने।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
