झापामा हात्तीको आक्रमणबाट एक जनाको मृत्यु भएको छ।
आइतबार बिहान २ बजे दमक नगरपालिका-३ दिपज्योति टोलस्थित जंगलबाट आएको हात्तीले आक्रमण गर्दा एक जनाको मृत्यु भएको जिल्ला प्रहरी कार्यालय झापाले जानकारी दिएको छ।
४५ वर्षीय मिनबहादुर भण्डारीलाई हात्तीले लछारपछार गरेको प्रहरीले जनाएको छ। उनले हात्ती धपाउन खोज्दा हात्तीले आक्रमण गरेको हो।
आक्रमणबाट उनको मृत्यु भएको खबर पाएपछि इलाका प्रहरी कार्यालय दमकबाट प्रहरीको टोली खटिएको थियो। उक्त टोलीले अनुसन्धान अघि बढाएको छ।
