भोजपुरका ग्रामीण भेगका खोलाखोल्सीमा पाउने निगुरो बिक्री हुन थालेको छ।
सडकको पहुँजच विस्तार भएसँगै गाउँघरमा खेर गइरहेको निगुरो अहिले ठूला सहरका भान्सामा पुग्न थालेको हो।
टेम्केमैयुङ गाउँपालिका–५ चोलन्ती, मझौलेका स्थानीयले वन जंगलबाट संकलन गरेको निगुरो अहिले धरान, इटहरी, विराटनगर, झापा, काठमाडौं लगायतका सहरमा जाने गरेको छ।
संकलित निगुरो गाउँघरबाट नै बिक्री हुने स्थानीयवासी रमेश विष्टले बताए। विगतमा त्यतिकै वन, पाखा खोलाखोल्सीमा खेर गइरहेको निगुरोले अहिले गाउँघरबाट नै बिक्री भइरहेको छ।
हालसम्म यो क्षेत्रबाट करिब २५०० किलो निगुरो निर्यात भएको उनको भनाइ छ। वन, जंगल, खोलाखोल्सी तथा चिस्यान क्षेत्रमा पाइने निगुरो कात्तिक, मंसिर महिनासम्म संकलन गर्न सकिने उनले बताए।
‘सडक विस्तारसँगै गाउँघरका कृषि उपजलाई बाहिरका सहर बजारमा सहज भएको छ,’ उनले भने, ‘निगुरो बिक्री होला भन्ने लागेको थिएन। तर अहिले खेर गइरहेको निगुरो बिक्री भइरहेको छ। याममा निगुरो बिक्री गरेर सामन्य रुपमा घर खर्च चलाउने अवस्था बनेको छ।’
गाउँघरमा संकलन गरिएको निगुरो प्रतिकेजी ३० देखि ४० रुपैयाँसम्म बिक्री हुने गरेको उनले बताए। एक जना कृषकले एक दिनमा ३० देखि ४० केजीसम्म निगुरो संकलन गर्ने उनको भनाइ छ। पात भएकोभन्दा डाँठ मात्र भएको निगुरोले राम्रो मूल्य पाउने उनले बताए।
स्थानीयवासीले वर्षायाम सुरु भएपश्चात् जेठ असारदेखि कात्तिक, मंसिर महिनासम्म निगुरो बेच्दै आएका छन्। वन, जंगलमा सजिलै पाइने, निगुरो अर्गानिक हुने भएकाले सहरका मानिसको रोजाइमा पर्ने गरेको छ। तराईमा पाइने निगुरोभन्दा पहाडी क्षेत्रबाट जाने डौँठे निगुरोको बजारमा राम्रो माग रहेको स्थानीयवासी लालबहादुर विष्टले बताए।
उन्यूँ प्रजातिमा पर्ने निगुरो पहाड र तराई सबैतिरका वन, जंगल तथा खोलाखोल्सीमा पाइने वनस्पति हो। निगुरो पहाडी क्षेत्रमा बढीमात्रामा पाइने भए पनि यहाँका गाउँघरका स्थानीयले भने कमैले मात्र खाने गरेका छन्।
जैविक र मौसमी तरकारी निगुरो पौष्टिकताले भरिपूर्ण हुने भएकाले स्वास्थ्यका लागि फाइदाजनक रहेको पोषणविद्हरुको भनाइ छ।
निगुरोमा प्रोटिन, क्याल्सियम, भिटामिन ए लगायतका पोषकतत्व पाइने भएकाले बालबालिका तथा गर्भवतीलाई धेरै लाभदायक हुने उनीहरुको भनाइ छ।
स्थानीयस्तरमा पाइने निगुरो बाहिरका बजारसम्म निर्यात हुने गरेकाले यसको उत्पादन र बजारीकरणका लागि गाउँपालिकाले आवश्यक पहल गर्ने गाउँपालिका उपाध्यक्ष रमादेवी राईले बताइन्।
गाउँपालिकाले कृषि र पर्यटनलाई प्राथमिकतामा राखेर योजनाबद्ध रुपमा काम गर्दै आएको उपाध्यक्ष राईको भनाइ छ। गाउँपालिकाभित्रका धेरै क्षेत्रमा निगुरो पाइने उनले बताइन्।
