गोरखा, आँपपिपलका रमेश थापा फेवाताल किनारामा बसेर गुजारा चलाउँछन्। उनको आम्दानीको स्रोत ताल किनारामा बसेर साना साना माला बेच्ने र फुट ट्र्याकमा हिँड्ने पर्यटकलाई मेहन्दी लगाइदिने हो।
गोरखाबाट ४ वर्षअघि पोखरा आएका थापालाई बिहीबार नगर प्रहरीले आक्रमण गर्यो। उनका सामग्री खोसेर लगिदियो।
‘नगर प्रहरीले मलाई कुटपिट गर्न थालेपछि मैले छेकेको थिएँ, त्यहीबेला प्रहरीले पक्राउ गरेर मलाई थुनिदियो,’ थापाले सेतोपाटीलाई भने, ‘आज दिउँसो मलाई छाडिदिए।’
थापाले फेवा किनारमा हिँड्ने कसैलाई पनि जबरजस्ती नगरेको बताए। हातमा मेहन्दीका विभिन्न डिजाइन बनाइदिने थापाले मोबाइल, चाबीमा झुण्ड्याउने डोरी र माला पनि बिक्री गर्दै आफ्नो गुजारा चलाएका छन्।
‘कोही कोही हातमा मेहन्दी लगाइदिन भन्छन्, कसैले नाम लेख्न लगाउँछन्,’ प्रहरी हिराासतबाट छुटेपछि उनले भने, ‘मैले कसैलाई जबरजस्ती गरेको छैन, एक्कासि मलाई आक्रमण गरेर मेरो सामान लुटेर लगिदिए।’
फुट ट्र्याकबाट पक्राउ परेका थापाले आफूलाई रिहाइ गर्दा ‘अब आइन्दा यस्तो काम नगर्नू’ भन्ने शर्त राखेको बताए।
‘काम नगर्ने हो भने कसरी जीविका चलाउने?,’ उनको प्रश्न छ।
वडा प्रहरी कार्यालय बैदामका प्रमुख डिएसपी राजेन्द्र श्रेष्ठले आफूहरूले पक्राउ नगरेको दाबी गरे।
नगर प्रहरीले ल्याएर बुझाएकाले राखिदिएको उनको भनाइ छ। ताल किनारमा माला बेचेका व्यक्तिलाई किन थुन्नुभएको हो? भन्ने प्रश्नमा डिएसपी श्रेष्ठले भने, ‘हामीले पक्राउ गरेको होइन, नगर प्रहरीले ल्याएर बुझाएकाले हामीले राखेका हौं, किन ल्याएर बुझाउनुभयो उतै सोध्नुस्।’
सडकमा बसेर होस् वा फेवाताल किनारमा बसेर चटपट, चिया, पानी, फलफूल, तरकारीबाली लगायत बिक्री गर्ने व्यवसायीमाथि पोखरा महानगर पछिल्ला दिनहरूमा क्रुर बन्दै गएको छ।
दसैं अघिदेखि पोखराको चिप्लेढुंगाका सडक व्यवसायीमाथि आक्रमण थालेको नगर प्रहरी केही दिनयता फेवाताल किनारमा केन्द्रित भएका छन्।
पोखरा महानगरको निर्देशनमा सडक व्यवसायीलाई हटाउन थालेको नगर प्रहरी प्रमुख पुरूषोत्तम थापाले बताए। तर उनले व्यवसायीलाई आक्रमण नगरेको दाबी गर्दै आएका छन्। पीडितले भने आफूहरूमाथि क्रुर आक्रमण गरेर लुटपाट मच्चाएको बताएका छन्।
फेवाताल किनारमा चटपट बेच्न बसेकी कमला भण्डारीलाई बिहीबार साँझ पनि आक्रमण गरी घाइते बनाएका छन्।
उनलाई नगर प्रहरीले घिसारेका थिए भने उनका कपडा च्यातिदिएका थिए।
‘भर्खर कुर्ची राखेकी थिएँ, नगर प्रहरी आएर सबै लिएर गयो, मलाई पिटेर निलडाम बनाएको छ,’ उनले सेतोपाटीलाई भनिन्, ‘मेरो घडी पनि हराएको छ, कपडा पनि च्यातिदिए।’
उनले फेवाताल किनारमा चटपट बेच्न थालेको ३ वर्ष भएको छ । धादिङबाट पोखरा आएकी कमलाका श्रीमान कारोना लागेर निधन भएको थियो। श्रीमानको मृत्यु भएपछि २ जना साना साना छोरीहरू हुर्काउन र पढाउन चटपट बेच्न थालेको बताइन्।
‘श्रीमानलाई कोभिड भएपछि एक महिना उपचार गर्न अस्पताल राखेको थिएँ, त्यतिबेला मेरो २० लाख ऋण लागेको छ,’ उनले भनिन्, ‘श्रीमानको निधन भएपछि छोरीहरू पढाउन र ऋण तिर्न चटपट बेच्न थालेकी थिएँ।’
नगर प्रहरीले सडक व्यवसायीलाई आक्रमण गरी घाइते बनाउने र जथाभावी लुटपाट मच्चाउने गरे पनि आफूले त्यस्तो निर्देशन नदिएको महानगरका मेयर धनराज आचार्यले बताए।
‘आक्रमण गर्न र लुटपाट मच्चाउन निर्देशन दिएको छैन, त्यस्तो गरेको भए कारबाही गर्छु,’ उनले भने, ‘फुटपाथमा व्यापार गर्न रोकेको हो।’
सडक व्यवसायीले भने आफूहरूले विकल्प दिन आग्रह गरेका छन्।
ताल किनारका व्यवसायीले आफूहरूले बाटो नछेकेको र सरसफाइमा ध्यान दिएको भन्दै उनले गुजारा चलाउन सडकमा आउन बाध्य भएको बताएका छन्।
नगर प्रहरीका साथै नेपाल प्रहरीले पनि कुटपिट र लछारपछार गर्न सघाइरहेको उनले बताइन्।
‘चटपट बेचेर २ जना छोरीहरू पढाइरहेकी छु, मेरा छोरीहरू मैले जस्तो फुटपाथमा आउन नपरोस् भनेरै यसो गरेकी हुँ’, कमलाले सेतोपाटीलाई भनिन्, ‘हामीलाई विकल्प देऊ भन्दा पनि जथाभावी आक्रमण गरिरहेका छन्।’
यो पनि:
पोखरा महानगर फेवाताल मिच्नेलाई केही गर्दैन, किनारामा चिया बेच्नेलाई कुटपिट
