एघार वर्षअघि डडेल्धुराको परशुराम नगरपालिका–७ सादनीका नरेन्द्र चुनारा परिवारसहित व्यापार/व्यवसाय गरेर जीविका चलाउने सपना बोकेर कञ्चनपुरको महेन्द्रनगर झरे।
दुई छोरा, एक छोरी र श्रीमतीसहित महेन्द्रनगरमा डेरा गरी बसेका नरेन्द्रले अहिले पनि सामान्य व्यापार गरेर जीविका चलाइरहेका छन्। घर छाडेर बसाइँ सरेको दशक नपुग्दै जेठा छोरा सुरेश चुनाराले खेल क्षेत्रमा फड्को मार्दा परिवारमा खुसीको सीमा नै छैन।
सादनी जोगबुढाको सबभन्दा विकट गाउँ हो। जहाँ अहिले पनि सडक पूर्वाधारलगायत कुनै पनि सुविधा पुग्न सकेको छैन।
'अन्धकार गाउँमा बसेर छोराछोरीको भविष्य कस्तो होला सोचेर महेन्द्रनगर आएको थिएँ', नरेन्द्रले भने, 'छोरा सुरेश सुदूरपश्चिमबाट पहिलो पटक कुस्तीमा वर्ल्ड च्याम्पियनसिप खेल्ने खबर सुन्दा हर्षित छौं।'
कुस्तीमा आठ वर्षदेखि सक्रिय भएर लागेका २१ वर्षीय सुरेश मुलुकको प्रतिनिधत्व गर्दै आगामी अक्टोबरमा नर्वेमा हुने वर्ल्ड च्याम्पियनसिपमा प्रतिस्पर्धीका रूपमा सहभागी हुँदैछन्।
हाल काठमाडौंको त्रिभुवन आर्मी क्लबमा आवद्ध सुरेशले ७४ किलो तौल समूहमा वर्ल्ड च्याम्पियनसिपमा प्रतिस्पर्धा गर्ने बताए।
'पहिलो चरणमा दुई खेलाडी क्वालिफाइड भएका छौं', उनले भने, 'साग खेलपछि पनि नियमित प्रशिक्षणमा रहेकाले नतिजा राम्रै आउनेमा आशावादी छु।'
मेहनती खेलाडीका रूपमा परिचित सुरेशले १३ औंं दक्षिण एसियाली खेलकुद प्रतियोगितामा काष्य पदक जितेका थिए।
उनले कुस्तीमा ३४ वर्षपछि नेपाल वर्ल्ड च्याम्पियनसिपमा सहभागी हुन थालेको बताए।
'अरु देशका खेलाडी पनि हामीजस्तै हुन्, उनीहरूको प्रशिक्षणस्तरीय होला आफ्नो ठाउँमा छु', उनले भने,'हामीले पनि आफूलाई कहिल्यै कमजोर सोच्नु हुन्न।'
आफ्नो उमेर समूहमा राष्ट्रियस्तरका प्रतियोगितामा चार स्वर्ण जितिसकेका सुरेशले खेल जगतबाटै नाम र दाम कमाउन सकिने बताए।
'बुवाले महेन्द्रनगरमा डेरा गरी जीविका चलाउने गरेकाले परिश्रमलाई खेर जान नदिने अठोटका साथ खेल क्षेत्र रोजेको हुँ', उनले भने, 'अझ बाह्य प्रशिक्षण भए अन्तर्राष्ट्रियस्तरबाट पदक ल्याउन कुनै ठूलो कुरा छैन।'
स्कुल पढ्दादेखि नै यहाँस्थित कवर्डहलमा कुस्ती खेल्न थालेका उनी खेल प्रदर्शनले नै आर्मी क्लबमा आबद्ध भए।
सुरेशसँगै उनकी बहिनी शिवानी पनि तेक्वान्दो खेलकी जुनियरतर्फकी खेलाडी हुन्।
'क्लबमा आबद्ध भएर मैले पनि सेनालाई खेलेर राष्ट्रियमा स्वर्ण र सागमा कास्य पदक दिएँ', उनले भने,'खेलाडी उत्पादन गाउँमुखी हुनुपर्छ।'
उनले दीर्घकालीन योजना बनाएर खेलाडीलाई बन्द प्रशिक्षणमा राख्ने खालका प्याकेज ल्याउनुपर्ने बताए।
'एक महिना बन्द प्रशिक्षणका भरमा खेलाडीबाट पदकको आश गर्नु बेठिक कुरो हो', उनले भने, 'खेल क्षेत्रमा लागेकाको दैनिकी चल्ने रोजगारीको पनि ग्यारेन्टी भए यो क्षेत्र झन् फष्टाउने थियो।'
केही वर्षयता मुलुकमै अब्बल देखिएको कञ्चनपुरका कुस्ती खेलाडी राष्ट्रियस्तरमा आफ्नो वर्चश्व जमाउन थालेका छन्। साग खेलकुद प्रतियोगितामा ऐतिहासिक स्वर्ण पदक दिलाउने खेलाडी संगीता धामी पनि कञ्चनपुरकै हुन्। रासस
