जाजरकोटको बारेकोट गाउँपालिका-४ मा पहिरो जाँदा दुई घर पुरिएका छन्। जिल्ला प्रहरी कार्यालय जाजरकोटका अनुसार गए रातिको वर्षाका कारण पहिरो जाँदा २ घर पुरिएका हुन्।
जिल्ला प्रहरी कार्यालय जाजरकोटका प्रमुख प्रहरी नायब उपरीक्षक किशोर श्रेष्ठले पहिरोका कारण भौतिक तथा मानवीय क्षति भएको भन्ने खबर आए पनि टेलिफोन सम्पर्क हुन नसक्दा एकीन गर्न नसकिएको बताए।
पहिरोमा परी १२ जनाको मृत्यु भएको भन्ने अपुष्ट खबर आएको छ।
‘पहिरोबाट भएको क्षतिको केही केही अपुष्ट विवरण त आएको छ, तर सम्पर्क नहुँदा एकीन भएको छैन्,’ डिएसपी श्रेष्ठले भने।
बारेकोटमा रहेको इलाका प्रहरी कार्यालयको टोली उद्दारका लागि घटना स्थलमा गएको तर प्रहरीको सेटमा समेत सम्पर्क हुन नसकेको श्रेष्ठले जानकारी दिए। उनका अनुसार जिल्ला प्रहरी कार्यालयबाट पनि प्रहरी निरीक्षकको नेतृत्वमा टोली बारेकोटतर्फ गएको छ। बीचमा दल्ली भन्ने ठाउँमा सडक भत्किएकाले त्यहाँबाट टोली हिँडेर बारेकोट पुग्ने उनले जानकारी दिए।
