कास्कीको माछापुच्छ्रे गाउँपालिका खोरकोमुखमा एक बृद्धाको हत्या भएको छ। कात्तिक ११ गते राति माछापुच्छ्रे गाउँपालिका ८ खोरकोमुखकी ७९ वर्षिया कौसिला गुरूङको हत्या भएको प्रहरीले जानकारी दिएको छ ।
बृद्धालाई राति उनकै कोठामा ढुङ्गाले हानेर हत्या गरिएको अवस्थामा फेला पारेको कास्कीका प्रहरी प्रमुख एसपी ओम रानाले जानकारी दिए । ‘घटनाको प्रकृति हेर्दा ढुङ्गाले हानेर हत्या गरेको देखिन्छ,’ रानाले सेतोपाटीसँग भने, ‘घरमा अरु कोही नभएको मोका छोपेर बृद्धाको हत्या भएको छ।’
‘बृद्धाको साथमा भएको हातमा लगाउने दुई वटा सुनका बाला र सिक्रि छैन,’ उनले भने ‘सुन लैजान उनको हत्या गरेको देखिन्छ।’
उनले घटनाको बारेमा थप अनुसन्धान भइरहेको र हत्यारा छिटै पत्ता लाग्ने बताए। आइतबार राति उनी घरमा एक्लै थिइन्।
उनी जेठा छोरासगँ बस्दै आए पनि कात्तिक १० गते जेठा छोरा दिदिको घरमा धान काट्न गएका थिए। उनी १२ गते दिउँसो घर आएपछि आमाको खोजी गरेका थिए।
घरको ढोकामा बाहिरबाट ताल्चा लगाए देखेपछि उनले आमालाई फोन गरेका थिए तर फोन घर भित्र नै बजेपछि भ्यालबाट हेर्दा बृद्धा मृत अवस्थामा भेटिएकी थिइन्।
