बौद्धस्थित मुलपानीमा प्रहरीले जुवाको खालमा छापा मार्ने क्रममा भाग्दा दुई जुवाडेको मृत्यु भएको छ ।
मृत्यु हुनेमा सरोज घले र सानुलाल तामाङ छन् ।
परिसरका प्रमुख एसएसपी वसन्त लामाले दिएको जानकारी अनुसार गएराति परिसरबाट सादा पोशाकमा खटिएको टोली जुवा खेल भइरहेको घरमा पुग्ने वित्तिकै भागाभाग भएको थियो ।
त्यसक्रममा दुई जनाले ३ तलामाथि झ्यालबाट हाम फाल्दा उनीहरु गम्भीर घाइते भएका थिए ।
लगत्तै, प्रहरीले उनीहरुलाई विएण्डबी हस्पिटल लगेको भए पनि केहीवेरमै चिकित्सकहरुले दुवै जनालाई मृत घोषणा गरे ।
प्रहरीले त्यहाँबाट २३ जनालाई पक्राउ गरेको छ । उनीहरुको साथबाट ४ लाख ४८ हजार रुपैयाँ पनि बरामद भएको छ ।
मुख्य नाइके हेमा गुरुङ भने फरार भएकी छन् । त्यहाँबाट एउटा कार र १० वटा मोटरसाइकल पनि बरामद .गरिएको परिसरले जनाएको छ ।
थप अनुसन्धान जारी छ ।
