नेपाल आयल निगमको इन्धन ढुवानी गर्ने ट्याङ्करमार्फत भारतमा अवैध लागूऔषध गाँजा तस्करी हुने गरेको रहस्य खुलेको छ।
लागूऔषध नियन्त्रण व्यूरोबाट खटिएको टोलीले मंगलबार बिहान मकवानपुरमा ट्याङकरभित्र लुकाईराखेको अवस्थामा २ सय ९५ केजी गाँजा फेला पारेको हो।
ना ४ ख ३९६९ नम्बरको ट्याङकर भित्र इन्धन राख्ने डिब्बामा गाँजा लुकाएर तस्करी भइरहेको सूचनापछि ब्युरोको टोलीले ट्याकंरलाई नियन्त्रणमा लिएर चेकजाँच गर्दा उक्त परिमाणमा गाँजा फेला परेको व्यूरोका एसएसपी विश्वराज पोखरेलले जानकारी दिए।
‘काठमाडौंमा तेल झारेर फर्कदै गरेको ट्याकंरमा गाँजा तस्करी हुने गरेको खबर हामीलाई प्राप्त भयो एसएसपी पोखरेलले भने,‘ट्याकर भित्र यस्तो कालो कर्तुक देख्दा हामीनै चकित पर्यौं, यस विषयमा हामी सम्वन्धित निकाएसँग पनि छलफल गर्नेछौ,’ पोखरेलले भने।
उनका अनुसार ट्याङकरका चालक पर्साका ३८ वर्षीय प्रल्हाद ठकुरीलाई नियन्त्रणमा लिएर अनुसन्धान अघि बढाइएको छ।
चालक ठकुरीले मकवानपुर मनहरी गाउँपालिका रमनटारमा गाँजा लोड गरेको प्रहरीमा बयान दिएका छन्।
चालक ठकुरीले नेपाल आउँदा भारतबाट तेल ल्याउने र फर्किदा गाँजा लिएर जाने गरेको बयान प्रहरीमा दिएका छन्।
चालक ठकुरीले एक पटक गाँजा रक्सौल पुर्याए बापत ४० हजारसम्म पाइने बताएका छन्।
उनले गाँजा कसको भन्ने आफूलाई कुनै जानकारी नभएको प्रहरीमा बयान दिएका छन्।
गाँजासहित पक्राउ परेका ठकुरीमाथि थप अनुसन्धान भईरहेको ब्यूरोले जनाएको छ।
ब्यूरो अधिकारीका अनुसार गाँजा तस्करले नेपालमा प्रतिकिलो गाँजा ६ हजारदेखि ८ हजार रूपैयाँसम्म किन्ने गरेको र त्यो गाँजा १५ देखि २० हजार भारतीय रूपैयासम्ममा बेच्ने गरेका छन्।
तस्करी समूहले मकवानपुर, धादिङलगायत जिल्लामा स्थानीयवासीको सहयोगमा आफैं गाँजा खेती गर्ने गरेको प्रहरी अनुसन्धानबाट खुलेको छ।
व्यूरोको टोलीले गत वैशाखमा पनि इन्धन बोक्ने ट्याकंरबाट गाँजा बरामद गरेको थियो।
काठमाडौंको चन्द्रागिरी नगरपालिका वडा नम्बर २ स्थित झ्याप्ले खोलामा ना ४ ख ५३६८ नम्बरको इन्धन ट्याकंरमा गाँजा लोड गर्दै गरेका बेला फेला परेको थियो। टोलीले लोड गर्दै गरेका १ सय ६० केजी गाँजाको चिप्पडसहित दुई जनालाई पक्राउ गरेको थियो।
