काठमाडौंको बसुन्धारामा युवतीको हत्या


काठमाडौंको बसुन्धारास्थित सुकुम्बासी टोलमा एक युवतीको हत्या भएको छ। मृतक युवतीको सनाखत हुन सकेको छैन। आईतबार राति करिब करिब १० बजेतिर युवतीको हत्या भएको प्रहरीले जनाएको छ।

लगाएको कपडा च्यातेर अर्धनग्न अवस्थामा सुकुम्बासी बस्तीको करिडोरमा फालेको अवस्थामा युवतीको शव फेला परेको काठमाडौं प्रहरी प्रमुख एसएसपी विश्वराज पोखरेलले जानकारी दिए।

घटना गम्भीर प्रकारको रहेको र घटनाका बारेमा अनुसन्धान हुँदै गरेको पनि एसएसपी पोखरेलले जानकारी दिए।

मृतक युवतीको टाउकोमा धारिलो हतियारले हानेर रगताम्मे भएको अवस्थामा फेला परेको प्रहरीले जनाएको छ। मृतक युवतीको शवलाई पोष्टमास्टर्मका लागि त्रिवि शिक्षण अस्पतालमा लगिएको छ।

यसैबीच युवती हत्याको अनुसन्धान गर्न प्रहरीले ८ जनालाई पक्राउ गरेको छ। ‘संकास्पद अवस्थामा रहेको ८ जना नियन्त्रणमा लिएका छौ,’ महानगरीय प्रहरी वृत्त महाराजगन्जका डिएसपी योगेन्द्र थापाले भने, ‘अहिले यसै भन्न सकिने अवस्था छैन, अनुसन्धान गर्दै छौ।’

Share:

© 2017 Setopati Sanchar Pvt. Ltd.