मानव बेचबिखन मुद्दामा वडाध्यक्षलाई ३७ वर्ष कैद


दुप्चेश्वर गाउँपालिका–१ घ्याङ्फेदीका वडाध्यक्ष सुनबहादुर तामाङलाई मानव बेचबिखन मुद्दामा दोषी ठहरिएका छन्। उनलाई जिल्ला अदालतले ३७ वर्ष ६ महिना कैद सजाय र  दुई लाख ५० हजार रुपैयाँ जरिवानाको फैसला गरेको छ।

जिल्ला न्यायाधीश लोकजङ्ग शाहको एकल इजलाशले वडाध्यक्ष तामाङसहित तीनजनालाई कैदका साथै जरिवानाको फैसला गरेको हो।

तामाङसहित उनका सहयोगीहरु सोही स्थानका शुकमान लामालाई ३२ वर्ष तीन महिना २३ दिन कैद र टीकाराम तामाङलाई ३० वर्ष कैदसहित जनही दुई लाख ५० हजार रुपैँया जरिवानाको फैसला भएको अदालतका श्रेस्तेदार महिमानसिंह विष्टले जानकारी दिए।

भारतमा बेचिएका युवतीले घर फर्किएपछि सामाजिक संस्थाको सहयोगमा तीनैजना विरुद्ध २०७२ कात्तिक १८ गते मानव बेचबिखन तथा ओसारपसारविरुद्ध अदालतमा मुद्दा दर्ता गरेका थिए। नेपाली काँग्रेसबाट वडाध्यक्षमा निर्वाचित तामाङलाई नेपाल प्रहरीको केन्द्रीय अनुसन्धान ब्यूरो (सिआइबी)ले पुस ७ गते पक्राउ गरी काठमाडौँ जिल्ला अदालतमा समेत दायर गरेको थियो।

मानव बेचविखन तथा ओसारपसार विरुद्धको मुद्दाका आरोपित अवतार तामाङ, पासाङ तामाङ र राधा तामाङको मुद्दा भने मुल्तवीमा राखिएको छ।

हाल उनीहरु फरार छन्।

Share:

© 2017 Setopati Sanchar Pvt. Ltd.