जाजरकोटको जुनीचाँदेमा ठूलो परिमाणको अवैध हातहतियार फेला परेको छ। जुनीचाँदे गाउँपालिका–११ स्थित चन्द्रबहादुर शाहीको घरमा घरेलु हातहतियार भेटिएको हो।
गोप्य सूचनाका आधारमा प्रहरीले उक्त हातहतियार बरामद गरेको हो। शाहीको घरमा विष्फोटक पदार्थसँगै जंगली जनावरका अंग पनि फेला परेको जिल्ला प्रहरी कार्यालय जाजरकोटले जनाएको छ।
प्रहरीले शाहीको घरबाट एकनाले भरुवा बन्दुक ३ थान, दुईनाले भरुवा बन्दुक १ थान, बाह्रबोर बन्दुक २ थान, एअर गन ३ थान रहेका छन् । यस्तै, सिसाको छर्रा, डेटोनेटर ८ थान, सेप्टी फ्यूज तार १ थान, बारुद १५ बट्टा, २४ वटा गोली पनि फेला परेको प्रहरीले जनाएको छ।
प्रहरीले जंगली जनावरका छाला ३, सिंग ११, दाँत र नङ गरि २२ वटा फेला पारेको छ।
प्रहरीले चन्द्रबहादुर शाही र उनका छोरा नेत्रबहादुर शाहीलाई पक्राउ गरि अनुसन्धान गरिरहेको जनाएको छ।
