माधवनारायण व्रतालुको परदेश यात्रा पनौती पुग्यो

नारायण महर्जन

पनौती, माघ ७

साँखुस्थित शालीनदीमा माधवनारायण व्रत बसेका व्रतालुले परदेश यात्रा शुरु गरेका छन् ।

माघ कृष्ण त्रयोदशी अर्थात् पुस ३० गते शालीनदीबाट–बज्रयोगिनी ढोकासम्म साष्टाङ्ग दण्डवत गरेर परदेश यात्रा शुरु भएको थियो । माघकृष्ण चतुर्दशीका दिन माघ १ गते व्रतालु साँखुबाट हिँडेरै बज्रयोगिनी र पशुपतिको दर्शन गरिसकेका छन्।

माघ ६ गते शनिबार साँखुबाट पनौती बास बस्न गएका उनीहरू बिहानै उठेर पनौती पोखरीमा स्नान गरी पूजा आधारना गरेका छन्। आजै उनीहरू पनौतीबाट साँखु बास बस्ने गरी फर्कनेछन् ।

व्रतालुले माघ ८ गते सोमबार श्रीपञ्चमी पर्व मनाउने छन्। माघ १० गते मंगलबार लगला सप्तमी पर्व मनाएर माघ १२ गते शुक्रबार द्रोण नवमीका दिन व्रतालुलाई खीर (तस्मी) खुवाइन्छ ।

द्रोण नवमीको भोलिपल्ट साँखुबाट चाँगुनारायणमा बास बस्ने गरी परदेश यात्रा गर्ने माधवनारायण व्रत विधि छ । माघ १४ गते चाँगुनारायणबाट साँखुमा बास बस्न फर्कने तयारी भएको छ ।

माघ १६ गते मंगलवार देव निमन्त्रणा गरी माघ १७ गते बुधबार अश्वमेध यज्ञ अर्थात् व्रत साङ्गे गरिन्छ । माघ १८ गते बिहीबार व्रतालुले माघ गाउने (मिगा पूजा) गरिन्छ । व्रतालुले शिवरात्रिका दिन जाग्राम बस्नुपर्ने नियम रहेको समितिले जनाएको छ ।

परदेश यात्राका क्रममा व्रतालु खाली गोडा हिँडेरै जानुपर्ने नियम छ। यसरी हिँडेर यात्रा गर्दा माधवनारायणको मन्त्र जप गर्छन् । यस वर्ष महिला पुरुष गरी १९७ जनाले माधवनारायणको एक महिने कठोर व्रत गरेका छन्।

हेर्नुहोस् तस्बिरमा