यसरी अस्ताए प्रकाश दाहाल

नारायण महर्जन

काठमाडौं, मंसिर ३

पूर्वप्रधानमन्त्री एवम् माओवादी केन्द्रका अध्यक्ष पुष्पकमल दाहालका पुत्र प्रकाश दाहालको अस्पताल ल्याउँदा ल्याउँदै बाटोमै मृत्यु भएको नर्भिक इन्टरनेसनल हस्पिटलले जनाएको छ।

अस्पतालले पत्रकार सम्मेलन गर्दै भनेको छ- प्रकाशलाई आइतबार बिहान ५:५० मा अस्पतालको इमर्जेन्सीमा ल्याइएको थियो । उनको शरीरमा जीवनको कुनै संकेत थिएन। शरीर चिसो थियो। आँखाको नानी खुलिसकेको थियो। चिकित्सकले उनलाई ५:५९ मिनेटमा मृत घोषणा गरेका थिए। प्रकाशलाई बिहान साढे ५ बजे उनका दुई सहयोगीले अस्पताल ल्याइपुर्‍याएको अस्पतालले जनाएको छ ।

पारिवारिक स्रोतका अनुसार शुक्रबार राति ८ बजेतिर प्रकाशले आफूलाई हल्का ज्वरो आइरहेको बताएका थिए । घरमा परिवारका अन्य सदस्यहरु खासै थिएनन् । आमा सीता दाहाल र भाञ्जीहरुमात्रै थिए। चुनाव लागेका कारण पत्नी विना पनि कञ्चनपुरतिरै थिइन् भने बाबु झापा गएका थिए।

सामान्य ज्वरो आए पनि प्रकाशले बेलुका आमा र भाञ्जीहरुसँग बसेर खाना खाएको पारिवारिक स्रोतले बतायो।

तीन दिनयता केही अस्वस्थ रहेका दाहाल चुनावी प्रचारमा प्रचण्डसँग झापा गरेका थिएनन् । प्रकाश दाहाल प्रचण्ड झापातिर लागेपछि त्यता नगइनकन चितवनबाट काठमाडौं फर्किएका थिए ।

प्रकाश दाहालको निधनको खवरपछि आइतबार बिहानै काठमाडौको थापाथलीस्थित नर्भिक अस्पताल खचाखच भइसकेको थियो । प्रकाश विरामी भएको र उपचारका लागि नर्भिक ल्याएको समाचारपछि समर्थक, सुभेच्छुक, आफन्त लगायतका सर्वसाधारण अस्पताल परिसरमा पुगिसकेका थिए । विभिन्न दलका नेता तथा कार्यकर्ता र सर्वसाधारणको उपस्थितिका कारण बिहानैबाट अस्पताल परिसरमा सुरक्षाकर्मीलाई सुरक्षा प्रदान गर्न हम्मेहम्मे परेको देखिन्थ्यो । अस्पतालमा उपस्थित सवैका मुहार मलिन देखिन्थे ।

जब चिकित्सकले प्रकाशको मत्युको घोषणा गरे तब त्याहाको पुरै अवस्था भावविह्ल बनेको थियो ।

प्रकाश माओवादी केन्द्रका अध्यक्ष प्रचण्डका छोरा मात्रै नभएर माओवादी केन्द्रका केन्द्रीय सदस्य समेत थिए ।

प्रकाश दाहालको ह्ृदयघातका कारण निधन भएको अस्पतालले पुष्टि गरेको छ ।

https://www.youtube.com/watch?v=n-0So-xvuk4&feature=youtu.be