गोरखामा माओवादी उम्मेद्वार सुशीला शिंखडा चढेको मोटरसाइकलबाट प्रहरीले पेस्तोल बरामद गरेको छ।
भिमसेन गाउँपालिका ३ धावाचोकबाट सदरमुकाम गोरखा आउने क्रममा उनी चढेको बा ७३ प ३३८६ नम्बरको मोटरसाइकल चेक गर्दा चालकको झोलाबाट पेस्तोल बरामद भएको एसपी प्रकाश अधिकारीले सेतोपाटीलाई जानकारी दिए।
चालक गुणप्रसाद खनाल झोला र मोटरसाइकल छाडेर फरार भएका छन् ।
नाइन एमएमको अटो पेस्तोल र त्यसमा लाग्ने ३ वटा गोली बरामद भएको अधिकारीले बताए । पेस्तोलमा पीएके लेखिएको छ। शिंखडा प्रतिनिधि सभातर्फकी समानुपातिक उम्मेद्वार हुन् ।
अनुसन्धानका क्रममा प्रहरीले माओवादी नेतृ शिंखडासँग सोधपुछ गरेर छाडेको छ। प्रहरीसँग नेतृ शिंखडाले आफूले मोटरसाइकल चालक नचिन्ने र लिफ्ट मागेर आएको बताएकी छिन् ।
प्रहरीले भने पेस्तोल उनकै भएकाे अाशंकामा छानबिन अघि बढाएको छ। यस विषयमा थप अनुसन्धान भइरहेको बताएको एसपी अधिकारीले बताए।
