तीन प्रतिशत ‘थ्रेस होल्ड’ कायम, संसदका दुई दर्जन दल अब आधा दर्जनमा सीमित हुने

फाइल फोटो


प्रतिनिधिसभामा दलीय हैसियत पाउनका लागि तीन प्रतिशत ‘थ्रेस होल्ड’ कायम गरिएपछि अब दलहरूको संख्या घट्ने निश्चित भएको छ ।

दलीय हैसियत पाउनका लागि एक सिट प्रत्यक्ष समेत जित्नुपर्छ । प्रतिनिधिसभा निर्वाचन र प्रदेश सभा निर्वाचन सम्बन्धी विधेयकमा थ्रेस होल्ड राखिएको हो ।

प्रदेशसभाका लागि भने डेढ प्रतिशत ‘थ्रेसहोल्ड’ कायम गरिएको छ । ‘तीन प्रतिशत मत नल्याउने र एक सिट प्रत्यक्ष निर्वाचन नजित्नेले दलीय हैसियत पाउने छैनन्।’ एमाले सांसद गंगालाल तुलाधरले सेतोपाटीसँग भने,‘तीन प्रतिशत पनि मत नल्याउनेको समानुपातिक मतको कुनै अर्थ हुनेछैन।’

साना दलहरूले भने यसको विरोध गरेका छन् । नेपाल मजदूर किसान पार्टीका सांसद प्रेम सुवालले पैसाका भरमा मात्रै निर्वाचन जित्ने व्यवस्था ल्याउन खोजिएको आरोप लगाए ।

रुपान्तरीत संसद हुँदै अहिलेसम्म आइपुग्दा पार्टीहरू फुट्ने  र जुट्ने क्रम चलिरहेको छ । अहिले संसदमा २६ वटा पार्टीहरू रहेका छन् । ‘थ्रेस होल्ड’ कायम भएपछि यो संख्या घट्ने निश्चित छ । दोस्रो संविधानसभालाई आधार मान्ने हो भने प्रतिनिधि सभामा दलीय हैसियत पाउने दलहरू एक दर्जन मात्रै हुन्छन् । पहिलो दल नेपाली कांग्रेसले समानुपातिकतर्फ २५ प्रतिशत भन्दा बढी मत पाएको थियो । नेकपा एमालेले २३ र नेकपा माओवादी केन्द्रले १५ प्रतिशत भन्दा बढी मत पाएका थिए ।

चौथो ठूलो दल बनेको तत्कालीन राप्रपा नेपालले ६ प्रतिशत भन्दा बढी मत पाएको भए पनि उसले प्रत्यक्षतर्फ एक सिट पनि जितेको थिएन । राणा नेतृत्वको राप्रपाले प्रत्यक्षतर्फ तीन सीट जिते पनि समानुपातिकतर्फ जितेको सीट जोड्दा  तीन प्रतिशत पुर्‍याएको थिएन ।

यी दुई पार्टी एकीकरण भएर विभाजन भई राप्रपा र राप्रपा प्रजातान्त्रिक बनेका छन् । दोस्रो  संविधान सभापछिका ६ वटा पार्टीहरू मिलेर अहिले राष्ट्रिय जनता पार्टी(राजपा) बनेको छ ।

सबै पार्टीको समानुपातिक मत जोड्दा पाँच प्रतिशत भन्दा बढी हुन्छ । त्यसैले दोस्रो संविधान सभाको मत कायम भयो भने राजपाले दलीय हैसियत पाउन सक्छ । मधेसी जनअधिकार फोरम र संघीय समाजवादी पार्टी मिलेर बनेको संघीय समाजवादी फोरमको पनि समानुपातिक मत तीन प्रतिशतभन्दा बढी छ । दुई पार्टीको मत जोड्दा यो प्रतिशत आएको हो ।

मधेसी जनअधिकार फोरम लोकतान्त्रिकले पनि तीन प्रतिशतको नजिक मत ल्याएको थियो । जनमुक्त पार्टीसँगको एकतापछि नेपाल लोकतान्त्रिक फोरम बनेको छ । पार्टी एकतापछि लोकतान्त्रिक फोरमको समानुपातिक मत प्रतिशत तीन प्रतिशत भन्दा बढी हुन्छ ।

नेपाली कांग्रेस,नेकपा एमाले र नकेपा माओवादी केन्द्रलाई ‘थ्रेस होल्ड’ले कुनै असर गर्दैन। दोस्रो संविधानसभामा पाएको मतलाई जोगाउन सके भने राजपा, संघीय समाजवादी फोरम र नेपाल लोकतान्त्रिक फोरमले पनि ‘थ्रेस होल्ड’ पार गर्नेछन् ।

दुवै राप्रपालाई भने  ‘थ्रेस होल्ड’ पार गर्न ठूलै संघर्ष गर्नुपर्ने देखिन्छ ।

Share:

© 2017 Setopati Sanchar Pvt. Ltd.