केसी आन्दोलनमा ऐक्यबद्धता जनाउँदै प्रदर्शन (तस्बिरहरू)


चिकित्सा शिक्षा र स्वास्थ्य सेवामा व्याप्त बेथितिविरूद्ध ११ ‌औ‍ं सत्याग्रह आन्दोलनमा रहेका वरिष्ठ चिकित्सक डाक्टर गोविन्द केसीप्रति ऐक्यबद्धता जनाउँदै शनिबार राजधानीमा प्रदर्शन गरिएको छ।

आमरण अनशनको छैठौं दिन आयोजित प्रदर्शनमा सयौं सर्वसाधारण माइतीघरदेखि बानेश्वरसम्मको र्यालीमा सहभागी थिए।

र्याली बानेश्वर चोक पुगेर सभामा परिणत भएको थियो। सहभागीहरुले चिकित्सा शिक्षामा बेथिति निम्त्याएको भन्दै सरकार र मेडिकल कलेजविरुद्ध नाराबाजी गरेका थिए।

२०६९ सालदेखि सुरु भएको डा. केसीको सत्याग्रह आन्दोलन पटक–पटक सम्झौता भएपनि कार्यान्वयन नहुँदा टुंगो लाग्न सकेको छैन।

केसीकै आन्दोलनको बलमा त्रिभुवन विश्वविद्यालयका उपकूलपति केदारभक्त माथेमाको संयोजकत्वमा उच्चस्तरीय समिति गठन भएको थियो। उक्त समितिको प्रतिवेदनका आधारमा केसी अनशनको मर्म समेट्दै चिकित्सा शिक्षा विधेयक मस्यौदा गरियो।

संसदमा विचाराधीन उक्त विधेयक रोक्न राजनीतिक दलका केही नेता र मेडिकल कलेज संचालकहरुले षड्यन्त्र गरेको भन्दै केसी ११ औं पटक अनशन बसेका हुन्।

उक्त विधेयकलाई मर्म नमर्ने गरी ‘फास्ट ट्रयाक’ बाट पारित गरियोस् भन्ने केसीको माग छ। उनले यसपाली राखेका ७ बुँदे मागको पहिलो बुँदामा यही विषय समेटेका छन्।

मेरिटका आधारमा विद्यार्थी भर्ना, शुल्क निर्धारण, चिकित्सा शास्त्र अध्ययन संस्थान (आइओएम) मा सहायक डिनहरुको नियुक्ती लगायत माग पनि समेटिएको छ।

कानून पारित भए, चिकित्सा शिक्षा सम्बन्धी यस्ता विषय स्वतः हल हुँदै जाने केसी पक्षको भनाइ छ। सरकार र केसी पक्षबीच शुक्रबारबाट वार्ता सुरु भएपनि निष्कर्षमा पुगेको छैन।

 

Share:

© 2017 Setopati Sanchar Pvt. Ltd.