एकताको संघारमा बाबुराम भट्टराईलाई केन्द्रीय सदस्यहरुका ३ सर्त


उपेन्द्र यादव नेतृत्वको संघीय समाजवादी फोरमसँग एकताको क्रममा रहेको नयाँ शक्ति पार्टीका केन्द्रीय सदस्यहरुले संयोजक बाबुराम भट्टराईसमक्ष तीनबुँदे सर्त अघि सारेका छन्।

नयाँ शक्तिको आर्थिक विभाग प्रमुख सुनिल खड्कासहित केन्द्रीय कार्यकारी समितिका ५० जना सदस्यले ‘यथास्थितिमा संघीय समाजवादी फोरमसँग एकता भए आफूहरु नमान्ने’ बताएका छन्।

पार्टी एकतापछि उपेन्द्र यादवलाई अध्यक्ष नमान्ने, एकीकृत पार्टीको नामबाट फोरम शब्द हटाउनुपर्ने र जबर्जस्ती एकता घोषणा गरे आफूहरु नयाँ पार्टीमा नगई नयाँ शक्तिमै बसेर काम गर्ने उनीहरुको सर्त छ।

एकीकरणको संघारमा रहेको नयाँ शक्ति नेपालका झन्डै ५० जना केन्द्रीय सदस्यले यस्तो सर्त राखेपछि भट्टराईले सोमबार र मंगलबार केन्द्रीय समिति बैठक डाकेका छन्। ‘बाबुराम भट्टराईबाहेक हामी उपेन्द्र यादवलाई अध्यक्ष मान्न तयार छैनौं,’ आर्थिक विभाग प्रमुख खड्काले भने, ‘अधिवेशनमा यादव विजयी भएर आए भने हामी स्वीकार गर्छौ।’

एकतापछि पार्टीको नाम नयाँ शक्ति फोरम राख्ने निर्णय भएकोमा पनि केन्द्रीय सदस्यहरुले विरोध जनाएका छन्। ‘पार्टीको नाममा फोरम राखिनु हुन्न भन्ने हाम्रो माग हो,’ खड्काले भने, ‘फोरम भनेको समूह हो। यो शब्दबाहेक अरु जेसुकै राखे पनि हामीलाई मान्य हुनेछ।’

एकतापछि यादवले पार्टी नेतृत्व गर्ने र पार्टीको नाममा फोरम शब्द राख्ने भए आफूहरु नयाँ शक्तिमै बसेर काम गर्ने खड्काले बताए।

‘हाम्रा माग सुनुवाइ नभए हामी बाबुराम भट्टराईले नै ल्याएको पार्टी सिद्धान्तमा रहेर सोही पार्टीमा काम गर्छौं,’ उनले भने, ‘भट्टराई फोरममा विलय हुन गए हामी नयाँ शक्तिमै बसेर नेतृत्व लिन्छौं।’

दुई पार्टीबीच यही साउन १५ गते एकता हुँदैछ। उपेन्द्र यादव अध्यक्ष रहने, बाबुराम भट्टराई सर्वोच्च नेता रहने र अशोक राई वरिष्ठ नेता रहने सहमति भएको छ। स्थानीय निकायको चुनावमा यी दुई पार्टीले तालमेल गरेका थिए।

Share:

© 2017 Setopati Sanchar Pvt. Ltd.