राजपामा ८ सय१५ सदस्यीय केन्द्रीय समिति, ६ जना प्रवक्ता


राष्ट्रिय जनता पार्टी(राजपा)को केन्द्रीय समिति  ८ सय  १५ जनाको भएको छ।

राजपाले बुधबार ८सय १५ जना केन्द्रीय सदस्य र १ सय ३४ जना पदाधिकारी सहितको सूची निर्वाचन अायोगमा बुझाएको छ।

पार्टीको अाधिकारिक हस्ताक्षर अध्यक्ष मण्डलका संयोजक महन्थ ठाकुरको चल्ने गरी निर्वाचन अायोगलाई बुझाइएको राजपाका महासचिव केशव झाले सेतोपाटीलाई बताए।

राजपामा अब तीन/तीन जना वरिष्ठ नेता र सहअध्यक्ष, ८ जना वरिष्ठ उपाध्यक्ष, २४  जना उपाध्यक्ष रहने महासचिव झाले  जानकारी दिए।

त्यस्तै ३१ जना महासचिव, ३४ जना सहमहासचिव, १२ जना सचिव, ५ जना कोषाध्यक्ष,  २ जना सहकोषाध्यक्ष,  ६ जना प्रवक्ता र १ जना सहप्रवक्ता  रहनेछन्। राजपा गठन हुँदा ६ पार्टीका सबै केन्द्रीय सदस्य र पदाधिकारीलाई राजपामा पनि त्यही हैसियतमा राख्ने सहमति भएको थियो।

निर्वाचन अायोगमा छ पार्टीको एकीकरणका लागि सबै पार्टीको निर्णय र राजपाको केन्द्रीय सदस्य र पदाधिकारीहरूको नागरिकताको प्रतिलिपी बुझाएको झाले बताए। ‘अब पार्टी कानुनी रूपमा नै एक भएको छ। यसले जनता,पार्टी नेता तथा कार्यकर्तामा उत्साह ल्याउनेछ’,  झाले भने।

गत वैशाख ७ गते तराई मधेस लोकतान्त्रिक पार्टी, सद्भावना पार्टी, राष्ट्रिय मधेस सद्भावा पार्टी, तराई मधेस सद्भावना पार्टी, नेपाल सद्भावना पार्टी र फोरम गणतान्त्रिक पार्टी मिलेर  राजपा गठन भएको थियो।

राजपामा  अहिले ६ अध्यक्ष सम्मिलित अध्यक्ष मण्डल बनेको छ।

अध्यक्ष मणडलमा महन्थ ठाकुर, राजेन्द्र महतो, शरतसिंह भण्डारी, महेन्द्र यादव, अनिल झा र राजकिशोर यादव  छन्। राजपा गठन हुनुभन्दा पहिला तमलोपामा २०५ जना केन्द्रीय सदस्य थिए जसमध्ये २५ जना पदाधिकारी थिए।

सदभावना पार्टीमा ३३ जना पदाधिकारीसहित १सय ६८ जनाको केन्द्रीय कमिटी थियो। राष्ट्रिय मधेस समाजवादी पार्टीमा १५ जना पदाधिकारीसहित १सय १ जना केन्द्रीय सदस्य थिए।

तराई मधेस सद्भावना पार्टीमा १९ जना पदाधिकारीसहित १ सय ३१ जनाको केन्द्रीय  कमिटी थियो। नेपाल सद्भावना पार्टीमा २८ जना पदाधिकारीसहित १ सय ६० जना केन्द्रीय सदस्य  थिए। फोरम गणतान्त्रिकमा १४ जना पदाधिकारीसहित ५० जनाको केन्द्रीय समिति थियो।

Share:

© 2017 Setopati Sanchar Pvt. Ltd.