तुलसीपुरका प्रमुखको पहिलो निर्णयः सुत्केरीलाई ५ हजार भत्ता दिने

तुलसीपुरका प्रमुखको पहिलो निर्णयः सुत्केरीलाई ५ हजार भत्ता दिने

तुसलीपुरका मेयर घनश्याम पाण्डे पदभार ग्रहण गर्दै। तस्बिरः नारायण


तुलसीपुर उपमहानगरपालिकाको पहिलो बैठकले सुत्केरीलाई पाँच हजार प्रोत्साहन भत्ता दिने निर्णय गरेको छ। बैठकले तत्काल नवजात शिशुलाई पोषणयुक्त खाना र मातृशिशु मृत्युदर कम गर्नका लागि प्रोत्साहन स्वरुप उक्त रकम दिने निर्णय गरेको छ।

पदभार ग्रहण गरे लगतै मेयर पाण्डेले साउन १ गतेदेखि लागू हुने गरि पाँच हजार प्रोत्साहन भत्ता दिने निर्णय गरेका हुन्। यो भत्ता सरकारी अस्पतालमा सुत्केरी हुने तुलसीपुर उप-महानगरपालिकाभरिका महिलालाई प्रदान गरिने उनले बताए।

त्यसैगरी नागरिकलाई सहजताका लागि प्रत्येक वडामा एम्वुलेन्स सञ्चालन गर्ने निर्णय पनि बैठकले गरेको छ। बैठकले स्थानीयलाई शुलभ दरमा एम्वुलेन्स सेवा प्रदान गर्नुका साथै वृद्ध र अपाङ्गहरुलाई ५० प्रतिशत छुट दिने निर्णय पनि गरेको छ। वैठकले उप-महानगरपालिकाका वडालाई नयाँ संरचना अनुसार सेवाग्राहीलाई पायक पर्ने ठाउँमा सर्वदलीय सहमति अनुसार १५ दिन भित्र समायोजन गर्नुपर्ने निर्णय पनि गरेको छ।

तुलसीपुर उपमहानगरपालिकामा विद्युतीय हाजिरीको सुरूवात गर्नुका साथै उपमहानगरपालिका र वडाहरुलाई अपाङ्गमैत्री, वालमैत्री र जेष्ठ नागरिक मैत्रीहरुको सहजताका लागि भौतिक संरचना निर्माण गर्ने समेत निर्णय गरेको छ ।

मेयर घनश्याम पाण्डेको अध्यक्षतामा बसेको वैठकले निर्वाचन सहज ढंगले सम्पन्न गर्न सहयोग गर्ने निर्वाचन अधिकृत, कर्मचारी, सुरक्षाकर्मीका साथै मतदातालाई धन्यवाद ज्ञापन गरेका थिए।

Share:

प्रतिकृया दिनुहोस

© 2017 Setopati Sanchar Pvt. Ltd.