बुटवलमा जित्नेलाई हार्नेको फूलमाला र अबिर (तस्बिरमा)

नवनिर्वाचित मेयर सुवेदीलाई बधाई दिँदै पराजित उम्मेदवार पाण्डे। तस्बिर : सेतोपाटी।


बुटवल उपमहानगरका बुधबार साँझ एमाले कार्यकर्तामा खुसीयाली छाएको थियो। एमाले उम्मेदवार शिवराज सुवेदी र गोमा आचार्यले बुटवलको मेयर र उपमेयर जितेकोमा कार्यकर्ता बधाई र शुभकामना बाँडिरहेका थिए।

त्यही भीडमा देखिए, उपमहानगरमा पराजित कांग्रेस र माओवादीका उम्मेदवार पनि। उनीहरुको अनुहार हारको दुःख थिएन बरु हाँसो देखिन्थ्यो। मेयरका पराजित उम्मेदवार खेलराज पाण्डेले पनि अरुले जस्तै मेयर सुवेदीलाई फूलमाया र अबिर लगाइदिए। उपमेयरमा पराजित माओवादी उम्मेदवार जगतबहादुर पोखरेलले पनि आचार्यलाई फूलमाला लगाए र अबिर घसिदिए।

जवाफमा गोमाले पनि पोखरेललाई माला लगाइदिइन्। यो दृश्य देखेर त्यहाँ पुगेका एमाले कार्यकर्ता र शुभेच्छुकसमेत भावुक बने।

केहीबेर अघि आएको अन्तिम मत परिणाममा सुवेदी २३२४९ मतसहित विजयी भए। उनका निकटम् प्रतिद्वन्द्वी नेपाली कांग्रेस र माओवादीको संयुक्त गठबन्धनका पाण्डेले २०८५१ मत पाए।

यस्तै उपमेयरमा पनि नेकपा एमालेकै आचार्यले २५ हजार ३०३ मत पाएर विजयी भइन् भने पोखरेलले १४७९२ मत पाए।

Share:

© 2017 Setopati Sanchar Pvt. Ltd.