दल दर्ता गर्न राजपा निर्वाचन आयोग जाँदै


राष्ट्रिय जनता पार्टी (राजपा) नेपाल बुधबारदेखि निर्वाचन आयोगमा दर्ता हुँदैछ। आयोगमा जान राजपाका नेताहरु पार्टी कार्यालय बिजुली बजारमा भेला भएका छन्।

सबै नेताहरु भेला भएर दिउँसो १ बजेसम्म निर्वाचन आयोग पुग्ने र पार्टी दर्ता गर्ने जानकारी राजपा नेता मनीष सुमनले सेतोपाटीलाई दिए।

‘अाज निवेदन दर्ता हुन्छ। पार्टीको अन्तरिम विधान र घाेषणपत्र सबै अायाेगलाई बुझाउँछाैं। केन्द्रीय कमिटिकाे अन्तिम नामावली अर्काे दिन बुझाउने भएका छाै’, राजपा  नेता केशव झाले सेतोपाटीसँग भने, ‘केन्द्रीय समिति ६ सयभन्दा बढीको हुन्छ। छ पार्टीमा रहेका केन्द्रीय समिति सदस्य र पदाधिकारी राजपाकाे केन्द्रीय समितिमा रहने सहमति भएको छ।’

तराई-मधेस केन्द्रित ६ पार्टी मिलेर राजपा बने पनि यो पार्टी दर्ता भएको थिएन। संविधान संशोधन, स्थानीय तहको संख्या वृद्धि लगायत माग पूरा नभएको भन्दै राजपाले पहिलो र दोस्रो चरणको स्थानीय निर्वाचन बहिष्कार गरेको छ। राजपाको आन्दोलनलाई नै ध्यानमा राखेर प्रदेश नम्बर २ को निर्वाचन पूर्वनिर्धारित असार १४ बाट असोज २ गतेलाई सारिएको छ।

संविधान संशोधन लगायत माग पूरा नभए तेस्रो चरणको निर्वाचनमा पनि भाग नलिने राजपा नेताहरुले चेतावनी दिँदै आएका छन्।

वैशाख ७ गते तराई मधेस लोकतान्त्रिक पार्टी, सद्भावना पार्टी, संघीय सद्भावना पार्टी, राष्ट्रिय मधेस समाजवादी पार्टी, फोरम गणतान्त्रिक र नेपाल सद्भावना पार्टी एकता भएर राजपा बनेको थियो।

Share:

© 2017 Setopati Sanchar Pvt. Ltd.