नेकपा एमालेको नयाँ नेतृत्व छान्न भएको मतदान २२ घन्टामा सकिएर अब मतगणनाको चरणमा प्रवेश गरेको छ।
एमाले निर्वाचन आयोगका अध्यक्ष विजय सुब्बाले मतगणना सकिन साढे दुईदेखि तीन घन्टा लाग्ने जानकारी दिए।
उनका अनुसार मतगणनाका लागि ८० वटै भोटिङ मेसिनबाट चिप्स संकलन भइसकेको छ। अब केही कानुनी प्रक्रिया पूरा गरेपछि प्रत्येक चिप्सबाट तथ्यांक निकालेर एकीकृत गरिन्छ।
'त्यसपछि सबै चिप्सको तथ्यांक जोडेर एकैपटक नतिजा सार्वजनिक गरिनेछ,' उनले भने, '१९ जना पदाधिकारी, ३०१ सदस्यीय केन्द्रीय कमिटी सबैको परिणाम एकैचोटि आउँछ।'
निर्वाचन आयोग अध्यक्षका हैसियतमा एमालेका दुई महाधिवेशनको निर्वाचन गराइसकेका सुब्बाले अघिल्लो महाधिवेशनको तुलनामा यसपालि बढी व्यवस्थित र शान्तिपूर्ण भएको बताए।
'अघिल्लोचोटि यति शान्तिपूर्ण र व्यवस्थित काम गर्न सकेका थिएनौं। निर्वाचन कमिटीमा बसेका साथीहरू पनि अभ्यस्त थिएनन्। केही वादविवाद भएका थिए। यसपालि चाहिँ अत्यन्तै सहज र शान्तिपूर्ण ढंगले काम सम्पन्न गर्यौं,' उनले भने।
मतदाता धेरै भएकाले लामो समय पर्खिनुपर्ने अवस्था भने आएको उनले बताए।
यसपालि मतदान स्थलमा उम्मेदवारको नामसूची लैजान किन दिइयो भन्ने प्रश्नमा उनले भने, 'चिट (नामसूची) त प्रतिबन्ध गरेकै थियौं। देखेको अवस्थामा अनुमति दिएका थिएनौं। तर धेरै लामो सूची छान्नुपर्ने भएकाले कतिपयले चिट बोकेका हुनसक्छन्। तर अनुमति नै दिइएको होइन।'
-1746009348.jpg)
