नेकपा एमालेभित्र अध्यक्ष केपी शर्मा ओली निकटका व्यक्ति भनेर चिनिने नेता हुन् राजेन्द्र गौतम। संखुवासभाका नेता गौतम अहिले एमालेका प्रचार विभाग प्रमुख छन्।
एमालेको जारी ११ औं महाधिवेशनमा उपमहासचिव पदमा उम्मेदवारी दिएका उनी ओली पक्षबाट पदाधिकारीमा पर्न चाहन्थे। ओली समूहबाट उपमहासचिव पदमा रघुवीर महासेठ, विष्णु रिमाल र लेखराज भट्ट उम्मेदवार छन्।
पदाधिकारीका कुनै पनि पदमा समेटिन नसकेपछि उपमहासचिवमा उम्मेदवारी दिएका गोतमलाई सेतोपाटीले यसबारे सोधेको छ।
उनीसँगको संक्षिप्त कुराकानी–
उपमहासचिवमा उम्मेदवारी दिनुभएको छ। कुन प्यानलबाट हो तपाईंको उम्मेदवारी?
प्यानल च्यानल केही नै होइन। कार्यकर्ताको तर्फबाट, एमालेको तर्फबाट दिएको हो मैले उम्मेदवारी।
अध्यक्ष ओलीको टिममा त पर्नुभएन होइन?
मेरो अध्यक्ष उहाँ नै हो। राजनीतिक निरन्तरता निष्ठा र निष्कलंकता नै मेरो उम्मेदवारीको एकमात्र आधार हो।
तर, तपाईंलाई अध्यक्ष ओलीको एकदमै निकट मानिन्थ्यो। उहाँको टिममा त पर्नु भएन नि तपाईं त्यो पदमा किन अटाउन सक्नुभएन?
अब नेकपा एमालेमा ओली मात्रै हुनुहुन्न। त्यहाँ ओलीका वरिपरि घुमेर बस्नेहरू, जो पार्टीको निष्ठावान, निरन्तर राजनीति गर्ने निष्कलंक व्यक्तिहरूको उपस्थिति भए आफ्नो राजनीति धर्मराउँछ भन्ने ठान्छन्। त्यसो भएको हुनाले मान्छेलाई आउन नदिने, छेक्ने, अनेक खालका प्रयास हुन्छन्। त्यो प्रयासको कोपभाजनमा म परेँ र सिकार भएको हो। त्यसो हुनाले मैले कार्यकर्तामा गएर अपिल गरेको हो।
अपिल के भनेर गर्दै हुनुहुन्छ? उपमहासचिवमा तपाईंको उम्मेदवारी किन?
मैले कार्यकर्तालाई भनेको छु कि म मेरो निष्ठामा, मेरो निरन्तरतामा, मेरो निष्कलंकतामा मेरो कुनै खोट तपाईंले भेट्नुहुन्छ भने मलाई भोट नहाल्नुस्, त्यस्तो देख्नु हुन्न भने हाल्नुस्। विवादमा रहेका, वित्तीय अनुशासन नभएका नैतिक अनुशासन नभएकाहरूलाई पराजित गर्न र पार्टीभित्र नेतृत्वको घेराबन्दी गर्ने तत्वहरूलाई परास्त गर्नका लागि मेरो उम्मेदवारी हो।
संस्थापन इतर पक्षले ओली ‘खराब’ तत्वहरूबाट घेरिएको भन्ने आरोप लगाउँथ्यो। अहिले पदाधिकारी नपाएपछि तपाईंलाई त्यो कुरा महसुस भएको हो?
यो कुराको अनुभूति थियो। अहिले व्यवहारमा भोगियो। हिजो अनुभूति मात्रै थियो, अहिले कोपभाजनको सिकार भएपछि व्यवहारमा परिणत भएको मात्रै कुरा हो।
भनेपछि यो महाधिवेशनमा अब तपाईंको समर्थन ओलीलाई हुन्न?
मैले नेपाली कम्युनिस्ट आन्दोलनमा जम्मा तीनटा मान्छेलाई नेता मान्छु। पुष्पलाल, मदन भण्डारी र केपी ओली। ज्ञान, सीप योगदानको हिसाबले। त्यसैले उहाँको राजनीतिको निरन्तरतालाई अगाडि बढाउन जनताको बहुदलीय जनवादको रक्षा त्यसको विस्तार र विकास गर्न मेरो उम्मेदवारी हो।
-1765698124.jpeg)
-1746009348.jpg)
