अमेरिकालाई सन्धिअनुसार पानी नछोडेको भन्दै अमेरिकी राष्ट्रपति डोनाल्ड ट्रम्पले मेक्सिकोलाई पाँच प्रतिशत थप भन्सार महसुल लगाउने धम्की दिएका छन्।
अमेरिका र मेक्सिकोले सन् १९४४ गरेको सन्धिअनुसार मेक्सिकोले हरेक वर्ष रियो ग्रान्डे नदीबाट अमेरिकालाई घटीमा तीन लाख ५० हजार एकड-फिट पानी पठाउनुपर्छ।
अन्तर्राष्ट्रिय समाचार संस्था रोयटर्सका अनुसार दुई एकड-फिट पानीले ओलम्पिक आकारको स्वीमिङ पुल भरिन्छ।
तर पछिल्लो पाँच वर्षमा मेक्सिकोले सम्झौता भन्दा आठ लाख एकड-फिट कम पानी पठाएको ट्रम्पले दाबी गरेका छन्। त्यसैले डिसेम्बर ३१ अघि २ लाख एकड-फिट पानी नछोडे मेक्सिकोलाई थप पाँच प्रतिशत भन्सार लगाउने उनले धम्की दिएका छन्।
दक्षिणी छिमेकी मेक्सिकोले दुई छिमेकी बीचको पानी बाँडफाँटको सन्धिको उल्लंघन गरेको आरोप लगाउँदै त्यसले सीमावर्ती टेक्सास राज्यका किसान मारमा परेको ट्रम्पको जिकिर छ।
'अहिलेको अवस्थामा, मेक्सिकोले जबाफ दिइरहेको छैन, र यो हाम्रो अमेरिकी किसानहरूका लागि धेरै अन्यायपूर्ण छ। उनीहरूले यो अति आवश्यक पानी पाउनु पर्छ। त्यसैले, मैले यो पानी तत्काल नछोडिएमा मेक्सिकोलाई पाँच प्रतिशत थप भन्सार महसुल लगाउनका लागि कागजातहरू बनाउन अधिकार दिएको छु,' उनले सामाजिक सञ्जालमा पोस्ट गर्दै भनेका छन्।
मेक्सिकोले भने जलवायु परिवर्तन लगायत कारणले खडेरीको अवस्था भएकाले सन्धिअनुसार पानी छोड्न नसकेको दाबी गरेको छ।
ट्रम्पले थप पाँच प्रतिशत भन्सार लगाउने धम्की दिएपछि मेक्सिकोले पानी विवादबारे अमेरिकासँग छलफल गर्ने बताएको छ।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1763886130.jpeg)
-1746009348.jpg)
