नेपाल जेनजी फ्रन्टले नेकपा एमालेले बारामा शान्ति सुव्यवस्था बिगार्ने काम गरेको भन्दै खेद व्यक्त गरेको छ।
बुधबार अपराह्न एक विज्ञप्ति जारी गर्दै फ्रन्टले दुई महिनाअघि तत्कालीन प्रधानमन्त्री केपी शर्मा ओली सरकारमा रहेको र अहिले फेरि एमालेकै व्यक्तिहरूले शान्ति बिगार्ने काममा लागेको बताएको छ।
'भाद्र २३ गते जेनजीको नेतृत्वमा भएको शान्तिपूर्ण प्रदर्शनमा नेकपा एमालेका अध्यक्ष केपी शर्मा ओली नेतृत्वको सरकारले दमन र अत्यधिक बल प्रयोग गरी २२ जना युवा विद्यार्थीको हत्या गरेको सर्वविदितै छ,' उनले भने, 'त्यस आपराधिक र नरसंहारी गतिविधिको दुई महिना बित्दै गर्दा जेन-जीको शान्तिपूर्ण कार्यक्रममा पुन: नेकपा एमाले सम्बद्ध व्यक्तिहरूले नै आक्रमण गरी शान्ति सुव्यवस्था बिगार्ने किसिमका गतिविधि हुनु खेदजनक छ।'
सिमरा एयरपोर्ट अगाडि जेनजी युवा र एमाले युवाहरूबीच झडप भएको थियो। त्यसपछि जिल्ला प्रशासन कार्यालयले बेलुकी ८ बजेसम्मका लागि कर्फ्यू आदेश जारी गरेको छ।
जेनजी फ्रन्टले शान्तिपूर्वक कार्यक्रमका लागि सहभागी भएकाहरूमाथि एमालेले आक्रमण गरेको बताएको छ।
‘संविधानले प्रत्येक नागरिकलाई प्रदान गरेको शान्तिपूर्ण भेला हुने अधिकार र स्वतन्त्र आवतजावत तथा बसोबासको अधिकार प्रयोग गर्दै सिमरा चोकमा शान्तिपूर्वक कार्यक्रम गर्न जुटेका जेनजी युवामाथि नेकपा एमालेका कार्यकर्ताले कुटपिट गरी अवरोध सिर्जना गरेको भन्दै फ्रन्टले घटनाप्रति कडा आपत्ति जनाएको हो,’ विज्ञप्तिमा भनिएको छ।
-1746009348.jpg)
