न्यू योर्कका नवनिर्वाचित मेयर जोहरन ममदानीले अमेरिकी राष्ट्रपति डोनाल्ड ट्रम्पसँग भेट्न पहल गरेका छन्।
ट्रम्पले लोकतान्त्रिक समाजवादी विचारधाराका ममदानीलाई 'वामपन्थी' भनेर गाली गर्ने गर्छन्। न्यू योर्कमै जन्मे-हुर्केका र त्यहीँ व्यवसाय गरेका ट्रम्पले चुनावअघि ममदानीलाई मत नदिन न्युयोर्क अपील गरेका थिए।
उनले रिपब्लिकन उम्मेदवार कर्टिस सिल्भालाई भोट हाले ममदानीलाई फाइदा पुग्ने भन्दै आफ्नो दलका मतदातासँग स्वतन्त्र उम्मेदवार एन्ड्रयू कोमोलाई भोट हाल्न आग्रह गरेका थिए।
ममदानीले जिते न्यू योर्क सहरलाई दिइने लगभग सबै संघीय अनुदान काट्ने धम्की पनि दिएका थिए। उनले यति धेरै विरोध गरे पनि दुई हप्ताअघि भएको चुनावमा ममदानी निर्वाचित भएका थिए।
चुनाव जितेपछि भने जनवरी १ मा कार्यभार सम्हाल्नुअघि ममदानीले ट्रम्पसँग भेट्न पहल गरेका हुन्।
आफ्नो सचिवालयले ट्रम्पसँग भेट मिलाउन ह्वाइट हाउसका अधिकारीहरूसँग सम्पर्क गरेको सोमबार उनले बताएका छन्।
आफूलाई ममदानीले भेट्न खोजेको ट्रम्पले बताएको भोलिपल्ट ममदानीले त्यसलाई पुष्टि गरेका हुन्।
'न्यू योर्कका मेयर हामीसँग भेट्न चाहन्छन् र हामी केही मिलाउनेछौं,' ट्रम्पले आइतबार भनेका थिए, 'हामी न्यू योर्कका लागि सबै कुरा राम्रो होस् भन्ने चाहन्छौं।'
ममदानीको टोलीका अनुसार ट्रम्पसँग उनको अहिलेसम्म कुराकानी भएको छैन, तर धान्नै नसकिने गरी महँगो भएको न्यू योर्कका जनतालाई राहत दिने प्रतिबद्धता अनुसार यो सम्पर्क भएको हो।
ममदानीको टोलीले गत हप्ता ह्वाइट हाउसका अधिकारीहरूसँग सम्पर्क गरेको उनका एक प्रवक्ताले द न्यू योर्क टाइम्सलाई बताए।
(विभिन्न अन्तर्राष्ट्रिय सञ्चार माध्यमहरूको सहयोगमा तयार पारिएको)
-1763886130.jpeg)
-1746009348.jpg)
