मधेस प्रदेशमा एमाले केन्द्रीय सदस्य एवम् संसदीय दल नेता सरोजकुमार यादव मुख्यमन्त्री नियुक्त भएका छन्।
प्रदेश प्रमुख सुमित्रा सुवेदी भण्डारीले अबेर राति यादवलाई मुख्यमन्त्रीमा नियुक्त गरेकी हुन्।
प्रदेश प्रमुखले संविधानको धारा १६८ (३) बमोजिम यादवलाई मुख्यमन्त्रीमा नियुक्त गरेकी छन्। प्रदेश सभामा नेकपा एमाले सबैभन्दा ठूलो दलको रूपमा रहेको छ।
शनिबार लोसपा दल नेता जितेन्द्र सोनार (सोनल)ले मुख्यमन्त्रीबाट राजीनामा दिएका थिए।
विश्वास मत लिने प्रयोजनका लागि बोलाइएको प्रदेश सभा बैठकमा मतविभाजन हुनुअघि नै मुख्यमन्त्री सोनलले राजीनामा दिएका थिए।
उनको सरकारलाई समर्थन गरेको माओवादी केन्द्रका दुई सांसदहरू रहबर अन्सारी र माला कर्णले विश्वास मत नदिने भनेपछि मुख्यमन्त्री सोनलले राजीनामा बुझाएका थिए।
उनले विश्वास मत परीक्षण नगरी राजीनामा दिएका कारण पुनः संविधान धारा १६८(२) अनुसार सरकार गठन आह्वान हुने बताएका थिए।
यद्यपि प्रदेश प्रमुख भण्डारीले १६८ (३) अनुसार सरोजकुमार यादवलाई मुख्यमन्त्री नियुक्त गरेकी हुन्।
मुख्यमन्त्री नियुक्त गरेपछि स्वास्थ्य उपचारका लागि भन्दै उनी काठमाडौं आएकी छन्।
-1746009348.jpg)
