राष्ट्रिय स्वतन्त्र पार्टी (रास्वा)का सहमहामन्त्री विपिनकुमार आचार्यले पार्टी छाडेका नेताहरूलाई आफ्नो ऊर्जा कुशासन र भ्रष्टाचारविरूद्ध खर्च गर्न अनुरोध गरेका छन्।
मंगलबार सामाजिक सञ्जालमार्फत उनले आफ्नो ऊर्जालाई कुशासन र भ्रष्टाचारविरूद्ध खर्च गर्न अनुरोध गर्दै रास्वपाको आलोचना नगरिदिन अनुरोध गरेका हुन्।
‘कुनै कारणवश पार्टी छाडेका साथीहरूलाई अनुरोध छ- कृपया आफ्नो ऊर्जा कुशासन र भ्रष्टाचारविरूद्ध खर्च गर्नुहोस्, रास्वपाको आलोचनामा मात्र होइन। नयाँ भनिएको राष्ट्रिय स्वतन्त्र पार्टी पुरानो भयो भन्ने लागेर अझ नयाँ बन्न खोज्नेहरूको नोकझोक पुरानालाई मात्र फाइदा पुर्याउने हो भन्ने हेक्का राखिदिन सम्बन्धित सबैलाई अनुरोध पनि छ,’ उनले लेखेका छन्।
पछिल्लो समय सुमना श्रेष्ठले रास्वपा छाडेकी थिइन्। उनले रास्वपा छाडेको घोषणा गर्दा पार्टीको आलोचना समेत गरेकी छिन्।
सहमहामन्त्री आचार्यले आफ्नो राजनीतिक यात्राको अभिन्न अंग रहेको पार्टीलाई तुच्छ बनाउँदा नयाँ पुस्ताको राजनीतिलाई लाभ गर्छ कि हानी भनेर पनि प्रश्न गरेका छन्।
यद्यपि पार्टीमा रहँदा प्रशंसा र छाडेपछि बदनाम गर्ने प्रवृत्ति नेपाली राजनीतिज्ञहरूको पुरानै चरित्र रहेको पनि उनको भनाइ छ।
‘हुनत, आफू रहँदा प्रशंसा र छोडेर जाँदा सम्भव भएसम्म बदनाम गर्ने प्रवृत्ति नेपाली राजनीतिज्ञहरूको पुरानो चरित्र हो। राष्ट्रिय स्वतन्त्र पार्टी छोडेर जाने विद्वान साथीहरूको अन्तर्वार्ता हेर्ने हो वा स्टाटसहरू पढ्ने हो भने त्यो रोग हामीमा पनि अझै रहेछ भन्न अप्ठ्यारो मान्नु पर्दैन। यस्तो लाग्छ, यो देशमा राष्ट्रिय स्वतन्त्र पार्टीभन्दा खराब पार्टी अर्को कुनै छैन र यो देशका सबै खराब नेताहरू यही पार्टीभित्रै छन्,’ उनले लेखेका छन्।
यस्तै उनले अहिलेको अन्तरिम सरकारले आपराधिक मनोवृत्तिका तत्वहरूलाई समयमै कारबाही गर्नुपर्ने पनि बताएका छन्। यो सरकारले कुनै पनि गलत कदम चाले पुराना दल र आन्दोलनकारी दुबैको कोपभाजनमा पर्ने निश्चित रहेको उनले धारणा राखेका छन्।
‘सरकारले नबिर्सनुपर्ने कुरा के हो भने भलै पुरानो राज्यसत्ताका शासकहरू अहिले सरकारमा छैनन्, तर उनीहरूको दल छ, संरचना छ र नेतृत्वप्रति विमति राखे पनि दललाई मान्ने ठूलो सदस्य संख्या अझै छ। यस्तो परिस्थितिमा सरकारले एउटा मात्र पाइला गलत चाल्यो भने पनि, पुराना दलहरू र आन्दोलनकारी दुबैको कोपभाजनमा पर्ने निश्चित छ,’ उनले भनेका छन्।
-1746009348.jpg)
