नेकपा (माओवादी केन्द्र) का उपमहासचिव वर्षमान पुनले राजनीतिकरूपले अध्यक्ष पुष्पकमल दाहाल ‘प्रचण्ड’को प्रस्ताव सही आएको विश्लेषण गरेका छन्।
बिहीबारबाट सुरू भएको केन्द्रीय समिति बैठकमा आफ्नो धारणा राख्दै उनले पार्टी आम रूपमा रूपान्तरण हुनुपर्छ, राजनीतिक रूपमा, विचारको रूपमा नयाँ उचाइमा जानुपर्छ र कार्यशैली–नेतृत्व प्रणालीमा क्रमभंग गरिनुपर्छ भन्ने अध्यक्षको प्रस्ताव ठीक भएको बताएका हुन्।
‘पार्टी आम रूपमा रूपान्तरण हुनुपर्छ, राजनीतिक रूपमा, विचारको रूपमा नयाँ उचाइमा जानुपर्छ। कार्यशैलीमा र नेतृत्व प्रणालीमा क्रमभंग गरिनुपर्छ भन्ने अध्यक्षको प्रस्ताव ठीक छ। यो प्रस्तावमा कसरी जाने भन्दा महाधिवेशन हुँदै एउटा बहस गरेर जाने,’ उनले भने।
उनले सबै पदाधिकारीमा त्यागको भावना उठिरहेको भन्दै त्यसमा शंका–उपशंकाको दृष्टिकोणले हेर्न नहुने धारणा राखे।
‘क्रमभंग गरौं। त्यसमा मैले पनि सुरू गर्छु भनेर अध्यक्षले भन्नुभयो कसरी सुरू गर्ने त? पदाधिकारी हामी त्याग गर्न तयार छौं। लोभ गरेका छन् कि भनेर शंका गरिराख्नुपरेन। होइन हामी तयार छौं। तर कुन विधि जाने त? बीच बाटैमा आन्दोलन छाडेर हिँड्न पनि चाहँदैनौं। हिँड्न पनि हुँदैन,’ उनले भने।
अध्यक्ष प्रचण्डले कार्यकारी भूमिका छाड्छु भन्नुको अर्थ समाजवादी आन्दोलन, साम्राज्यवादविरूद्ध लड्ने आन्दोलन छाड्छु नभनेको उनले बताए।
‘भूमिका बदल्ने भनेको हो, सकारात्मक रूपले बहस गरौं। कोही नेतातिर इंगित पनि होइन, कोही साथीतिर पनि होइन। एउटा विचारका साथ क्रमभंग गरौं। विचारधाराका हिसाबले आजका प्रश्नहको जवाफ दिऊँ,’ उनले भने।
माओवादी केन्द्रको बैठकमा समूहगत छलफल सकिएर पदाधिकारीहरूले आफ्नो धारणा राखिरहेका छन्।
-1746009348.jpg)
