राष्ट्रिय स्वतन्त्र पार्टी (रास्वपा) का उपसभापति स्वर्णिम वाग्लेले लुम्बिनी प्रदेश सभापति देवराज पाठकलाई राजसंस्थाबारे आफ्नो धारणा प्रष्ट पार्न भनेको खुलेको छ।
मंगलबार र बुधबार बसेको पार्टी केन्द्रीय समिति बैठकमा प्रदेश सभापति पाठकले हिन्दु राष्ट्र, संघीयता खारेजी र संवैधानिक राजतन्त्रका पक्षमा वकालत गरेको आफूले पाएको भन्दै त्यसबारेमा प्रष्ट हुन भनेको एक नेताले जानकारी दिए।
‘लुम्बिनी प्रदेश सभापति देवराज पाठकले सामाजिक सञ्जाल फेसबुक लगायत माध्यममा धारणा राख्दा देश हिन्दु राष्ट्र कायम हुनुपर्ने, संघीयता खारेज हुनुपर्ने भन्नुहुँदो रहेछ, संवैधानिक राजतन्त्रको पक्षमा पनि वकालत गरेको पाएको भन्दै उपसभापति स्वर्णिम वाग्लेले यी विषयबारे रास्वपाको दृष्टिकोण बुझेरै पार्टीमै लाग्नुभएको होला, आफूलाई अझ प्रष्ट पार्नुस् भन्दै सम्झाउनुभएको हो,’ ती नेताले भने।
ती नेताका अुनसार रास्वपा धर्म निरपेक्षता, गणतन्त्रप्रति प्रतिबद्ध रहेको भन्दै पार्टीका सदस्यहरूले आधारभूत सिद्धान्त, नीति, कार्यदिशा बुझेर मात्रै धारणा राख्नुपर्ने र संवैधानिक राजतन्त्रको वकालत गर्न नहुने बताएका थिए।
लुम्बिनी प्रदेश समितिमा भने यसमा विरोधाभाष देखिएको छ। गत असोज ४ गते बसेको प्रदेश समितिको बैठकले संघीयता, गणतन्त्र, धर्मनिरपेक्षता जस्ता विषय जनताको अभिमतबाट टुंगो लगाउनुपर्ने निर्णय गरेको थियो।
‘संघीयता, गणतन्त्र, धर्मनिरपेक्षता जस्ता विषयमा जनताको अभिमतबाट टुंगो लगाउनुपर्छ भन्नेमा पार्टी उभिनुपर्छ भन्ने हाम्रो मत रहेको छ,’ प्रदेश समिति बैठकले निर्णय गर्दै भनेको थियो।
उक्त निर्णय पार्टी केन्द्रीय समितिमा पनि पठाइएको थियो। प्रदेश समितिले बैठकमै जनमत संग्रहको प्रस्ताव गर्दै निर्णय गर्न थालेपछि उपसभापति वाग्लेले प्रदेश सभापतिलाई पार्टी नीति र कार्यदिशा सम्झाएका हुन्।
प्रदेश सभापति देवराज पाठकले प्रदेश समिति बैठकमा केही साथीहरूले जनमत संग्रहबारे धारणा राखे पनि त्यसलाई आफूले केन्द्रीय समिति बैठकमा नलगेको बताए।
‘बैठकमा कतिपय साथीहरूको त्यस्तो धारणा हुनसक्छ। तर हामीले प्रदेश समितिको धारणा माथिल्लो कमिटीमा लगेनौं,’ उनले भने।
-1758866593.jpeg)
-1746009348.jpg)
