नेपाली कांग्रेसका उपसभापति पूर्णबहादुर खड्काले काठमाडौंमा आफ्नो घर र जग्गा नभएको बताएका छन्।
भाइबुहारीलाई माइतीले बनाइदिएको घरमा आफू पनि बस्दै आएको र त्यो घर जेनजी पुस्ताको प्रदर्शनका क्रममा भदौ २४ गते आगजनी भएको उनले बताए।
‘काठमाडौंमा पूर्ण खड्काको घर छैन भन्यो भने कोही पत्याउँदैन। म के गरुँ? काठमाडौंमा मेरो एक टुक्रा जमिन पनि छैन। तर यो कुरा आज को पत्याउँछ? मेरो यो अवस्था मैले समाजलाई कहिल्यै बुझाउन नसकेको रहेछु,’ खड्काले नेपाली कांग्रेस सुर्खेतको आगजनीमा परेको कार्यालयबाहिर बिहीबार पत्रकार सम्मेलन गर्दै भने।
उपसभापति पूर्णबहादुरका महिला भाइ डम्बरबहादुर र बुहारी सन्जु दुवै डाक्टर थिए। डा. सन्जुको २०८० जेठमा कार दुर्घटनामा परेर निधन भएको थियो।
सुर्खेततर्फ जाँदै गरेका डा. सन्जु सवार कारलाई बाँकेको राप्तीसोनारी गाउँपालिका–८ मुगुवा खोलानजिकै नेपालगन्जबाट पूर्वतर्फ जाँदै गरेको बसले ठक्कर दिएको थियो। दुर्घटनामा कार चालकको पनि मृत्यु भएको थियो।
उनै डा. सन्जुका लागि उनका माइतीले काठमाडौंमा घर बनाइदिएका थिए।
‘मेरो भाइको ससुरालीले बनाइदिएको घरमा म बसेको छु, त्यो घर पनि मेरो भन्दै जलाइदिए। त्यो डा. डम्बर खड्का र सन्जुको घर हो, जुन सन्जुको सपनाको मन्दिर थियो। परिवार, श्रीमान् र छोराछोरीलाई उनले एउटा नासो छाडेर गएकी थिइन्,’ उपसभापति खड्काले भने।
यसपछि उपसभापति खड्काले जेनजी पुस्ताको आन्दोलनका क्रममा सुर्खेतमा रहेको पुर्ख्यौली घरमा समेत आगजनी भएको प्रसंग निकाले।
‘मेरो आमाले आजभन्दा ४० वर्षअघि बनाएको घर थियो त्यो, बहुत कम परिवारले पुरानो घर जतनसाथ राख्छन्, जस्तो घर थियो त्यसलाई नभत्काएर संग्रहालयका रूपमा राखेका थियौं, बुवाआमाका कपडाहरू, दराज, सारा कपडा जस्ताको तस्तै जोगाएर राखेका थियौं हामीले। चीरकालसम्म राख्ने र त्यो घर नचलाउने भनेर, सम्हालेर राखेको घर थियो। त्यो घर केका लागि जलाइदिए?,’ भावुक हुँदै उपसभापति खड्काले भने।
साथै उपसभापति खड्काले बाबुले बनाएको दुई कोठे अर्को घरको प्रसंग पनि सुनाए।
‘अर्को घर बुवाले २ कोठाको बनाउनुभएको थियो। पछि विष्णु खड्काले त्यो घरलाई चार कोठा बनाए। मैले जीवनमा लगानी गरेको तपाईंहरू पत्याउनुहुन्छ कि हुन्न। मैले त्यो घर बनाउँदा म पनि यहीँ बस्ने हो भनेर ४ लाख रुपैयाँ दिएको छु,’ उनले भने। यो घरसमेत आगजनीमा परेको उनको भनाइ छ।
साथै आफूले कुनै बेला सुविधाको गाडी लिएको र दुई तीन वर्षपछि १० लाख रुपैयाँ ऋण लागेर बेचिदिएको उनले बताए।
‘त्यसपछि मसँग गाडी थिएन, कतै जानुपरे ट्याक्सी बोलाएर जाने गरेको थिएँ,’ उनले भने, ‘भाइको ससुरालीले बनाएको घरमा बस्छु, भाइ विष्णुले आफ्नो पौरख र परिश्रमले एउटा गाडी किनेर पठाइदिए, त्यो गाडी चढ्दैछु।’
सुर्खेतमा आफ्ना भाइहरूले ५० वर्षसम्म मेहनत र पसिना छुटाएर सिर्जना गरेका करोडौंका सम्पत्ति ध्वस्त भएको उनको भनाइ छ।
यसपछि उपसभापति खड्काले आफूहरूको बाल्यकाल पनि सम्झिएका थिए।
‘एउटा न्यारेटिभ बनाइएको छ- चप्पल लगाएर काठमाडौं आएका नेता अहिले यस्तो उस्तो, यसो गरेका छन् उसो गरेका छन् भनेर। म मगन्ते र भिग मगुवाको छोरा थिइनँ, त्यो बेलाको जिम्मलको छोरी आमा थिइन् भने मुखिया बाबु थिए। मेरा बाबुले म ५ कक्षामा पढ्दै गर्दा सुट लगाएर काठमाडौं पठाएका थिए,’ उनले भने।
-1746009348.jpg)
