नेपाली कांग्रेसका महामन्त्री विश्वप्रकाश शर्माले सरकारमा जेनजी पुस्ताको प्रतिनिधित्व नदेखिएको बताएका छन्।
भदौ २३ र २४ गते जेनजी पुस्ताले आन्दोलन गरे पनि मन्त्रीहरू भने अरू नै भएको उनको भनाइ छ।
बनेका सबै मन्त्री योग्य देख्छु, एकसे एक व्यक्ति मन्त्री हुनुन्छ, तर एक जना पनि जेनजी युवा मन्त्री नबनाइनु तिनको योग्यताप्रतिअविश्वास कि आन्दोलनको अपहरण? आन्दोलन जेनजीको, बलिदान जेनजीको तर सरकारमा खोइ जेनजी?,’ बिहीबार पार्टीको धनुषा जिल्ला कार्यालय प्राङ्गणमा पार्टीका कार्यकर्ताहरूलाई सम्बोधन गर्दै शर्माले भने।
जेनजी पुस्ता आन्दोलनमा अहिलेसम्म ७४ जनाको मृत्यु भएको छ।
उनले अहिले संविधान घाइते अवस्थामा रहेको पनि बताए। निर्वाचनमार्फत संसद ब्युँताएर संविधानलाई ट्र्याकमा ल्याउनु पर्ने उनले बताए।
‘मंसिरभित्र १५ औं महाधिवेशन या मंसिर मसान्तभित्रै विशेष महाधिवेशन अहिलेको अनिवार्य बाटो हो l केन्द्रीय समितिबाट संयम र सहमतिपूर्वक त्यो बाटोमा हामी पुग्नेछौं, पुग्नुपर्छ,’ उनले भने।
महामन्त्री शर्माले आगजनीमा परेको कांग्रेस धनुषाको कार्यालय अवलोकनपछि मधेस प्रदेश सभा भवन, कांग्रेस प्रदेश कार्यालय, नेता विमलेन्द्र निधि, सहमहामन्त्री महेन्द्र यादव र केन्द्रीय सदस्य रामकृष्ण यादव लगायतको आगजनीमा परेका घरहरू अवलोकन गरेका थिए।
-1746009348.jpg)
