नेकपा (एमाले) का सचिव योगेश भट्टराईले भदौ २३ को जेन जी विद्रोहले दिएको सन्देश ग्रहण गर्दै राज्य समाज र पार्टी संरचनामा बहुआयमिक रूपान्तरण गर्नुपर्ने बताएका छन्।
भट्टराईले बिहीबार एक विज्ञप्तिमार्फत् मुलुकलाई अनिश्चयको अँध्यारो सुरूङतिर लैजाने चिन्ताहरू व्याप्त रहेको र ती निराशा र अनिश्चय सम्बोधनको पहिलो शर्त राज्य समाज र पार्टी संरचनामा बहुआयमिक रूपान्तरण भएको बताएका हुन्।
‘भदौ २३ गतेको जेनजी आन्दोलन र भदौ २४ गतेको विध्वंसपछि तपाईं–हामी बिस्तारै आफ्नो दैनिकीमा फर्किरहेका छौं। तर यसले छोडेको असर भने युगौंसम्म रहनेछ। भदौ २३ गतेको आन्दोलनले हाम्रो राजनीतिक सत्ता र संरचनामा असाधारण बदलाब ल्याएको छ,’ उनले भनेका छन्।
साथै भदौ २४ को अकल्पनीय विध्वंसले देशको आर्थिक संरचना भताभुंग बनाएको उनले बताए।
‘हाम्रो सामाजिक मानसपटलमा गहिरो दर्दहरू छोडी गएको छ। हामीले आजसम्म बचाएर ल्याएको सांस्कृतिक मूल्यहरूमा घाउचोट लागेको छ। मुलुकलाई अनिश्चयको अँध्यारो सुरुङतिर लैजाने चिन्ताहरू पनि उत्तिकै छ। मलाई लाग्छ, ती निराशा र अनिश्चय सम्बोधनको पहिलो सर्त हो– भदौ २३ ले दिएको सन्देश ग्रहण गर्नु र त्यसमा अभिव्यक्त भावनाको वस्तुगत सम्मान गर्दै राज्य समाज र पार्टी संरचनामा बहुआयमिक रूपान्तरण गर्नु हो,’ उनले भने।
भदौ २३ मा सामाजिक सञ्जाल बन्दको विरोध र सुशासनको माग राखेर सडकमा उत्रिएका जेन–जी पुस्ताका प्रदर्शनकारीमाथि तीव्र दमन भएको बताउँदै उनले यो घटनाको न्यायिक छानबिनको माग राखेका छन्।
‘एकातिर आफ्नो माग र भावनाहरूप्रतिको अपमान-बेवास्ता गरिएको निष्कर्ष अर्कातिर आफ्ना निहत्था साथीहरूमाथि भएको बर्बर दमनप्रतिको आक्रोश। त्यही मौका छोपेर फरकफरक स्वार्थ बोकेका गलत समूहबाट भदौ २४ मा जेन–जी आन्दोलन दूरुपयोग भयो,’ उनले घटनाको विश्लेषण गर्दै भनेका छन्।
आन्दोलनमा श्रृंखलाबद्ध र संगठित घुसपैठ गरिएको उनको निष्कर्ष छ। यही आवरणमा अपराधिक गतिविधि भएको पनि उनले बताएका छन्।
‘हाम्रा राष्ट्रिय सम्पदा र सम्पत्तिहरूमा आगो झोसियो। निजी तथा व्यावसायिक संरचनामामाथि आगजनी र तोडफोड गरियो। हाम्रा इतिहास र गौरव जोडिएका संरचनाहरू खण्ड भए। आफ्नो समयमा परिर्वतन र रूपान्तरणमा महत्त्वपूर्ण योगदान गर्नु भएका हाम्रा नेताहरूमाथि आक्रमण भयो, घर जलाइयो। यसले भदौ २३ गते जेन–जीहरूले पवित्र माग राखेर गरेको व्रिदोहलाई बदनाम र विद्रुप बनायो। विश्वसामु लज्जाबोधको अवस्था आयो। भदौ २४ गतेको अकल्पनीय विध्वंस देश र जेन–जीहरुको भावना र आर्दश विरुद्धमा थियो। यसको सत्यतथ्य छानविन हुनुपर्छ,’ उनले भनेका छन्।
नेपालको पछिल्लो घटनाका बारेमा भूराजनीति र अन्तराष्ट्रिय शक्ति केन्द्रको भूमिकाको पनि चर्चा हुने गरेको बताउँदै आफू धेरै त्यता प्रवेश गर्न नचाहेको बताएका छन्। आगामी दिनमा सबै उद्घाटित हुने उनको विश्वास छ।
‘एउटा भनाइ छ– अर्कालाई दोष लगाउनुपूर्व आफ्नौ थैली बलियो गरी कस्नु! छिमेकी मित्र राष्ट्रहरू तथा अन्य मित्र राष्ट्रहरूलाई म भन्न चहान्छु – तपाईंहरूले नेपालको लोकतान्त्रिक प्रक्रिया र नेपालीहरूको विकासको चाहनालाई गर्दै आउनु भएको सहयोगप्रति धन्यवाद छ। तर आजको अस्थिर र अनिश्चयमा नेपाललाई प्रयोगशाला बनाउने प्रयास हुने छैन भन्ने मेरो गहिरो विश्वास छ। संविधानको रक्षा र लोकतान्त्रिक प्रक्रियाको पुर्नजीवनको लागि तपाईंहरुको सकरात्मक सद्भाव भने अपेक्षित छ,’ उनले भनेका छन्।
अहिले पार्टी पंक्ति सामु एकातिर पीडा, हतासा, निराशाहरू रहेको अर्कातिर सिंगो एउटा पुस्ताको आक्रोश पनि सँगै रहेको बताएका छन्। यो सँगसँगै आशा र अपेक्षाहरू पनि रहेको भुल्न नहुने उनले बताएका छन्।
‘सबैभन्दा बढी प्रश्नहरू छन्। तपाईंहरूले आक्रोश र आशाको नजरले हामीलाई सोधिरहनु भएको छ– अब तिमीहरूले हिँड्ने बाटो कुन हो? बदलिन्छौ कि उस्तै बस्छौ? मैले सामाजिक सञ्जाल हेरिरहेको छु– सञ्चार माध्यमहरू पढिरहेको छु। तपाईंहरूले हामीलाई सोधिरहनु भएको छ– तिमीहरूसँग आत्मालोचना र स्वीकारोक्ति छैन? आफ्ना कमजोरीहरूप्रति माफी माग्दैनौं?,’ उनले भनेका छन्।
यसअघि पनि आफूले भदौ २४, २५ र २८ गते सामाजिक सञ्जालमार्फत केही कुरा राखेको बताएका छन्।
आफूहरूले असल प्रयास र प्रयत्नहरू जारी राखेको, अनेक सीमा, अबरोध र अप्ठ्याराहरूको बीचमा पनि प्रयासहरू प्रयत्नहरू जारी थिए भनेर बताउन चाहेको उल्लेख गरेका छन्।
‘तर सब ठिकठाक थिएनन् भन्ने पुष्टि २३ भदौले गरिसकेको छ। यो सत्यलाई हामीले स्वीकार गर्नुपर्छ। र हामीले भन्नुपर्ने हुन्छ– बदलिएका आवश्यकता र अपेक्षाहरू पूरा गर्न सफल नभएकोमा हामी माफी चाहन्छौं,’ उनले भनेका छन्।
-1746009348.jpg)
