राष्ट्रिय स्वतन्त्र पार्टी (रास्वपा) सुदूरपश्चिम प्रदेश समितिको बैठकले पार्टी केन्द्र पुनर्गठन गर्न माग गरेको छ।
सोमबार साँझ बसेको प्रदेश समिति बैठकले तत्काल पार्टी केन्द्र पुर्नगठन गर्नुपर्ने निर्णय गरेको हो। यसबारे महामन्त्री सन्तोषराज जोशीले पत्र पठाएर पार्टी केन्द्रलाई जानकारी गराएका छन्।
‘मुलुकको समृद्धि, पार्टीको सांगठनिक सुधारका निम्ति पार्टी पंक्तिले आफ्नो कमजोरी स्वीकार्नुपर्ने निर्णय गरिएको छ। व्यक्तिलाई केन्द्रमा राख्ने चलन पूर्ण रूपमा निस्तेज गर्नुपर्ने, केन्द्रीय समितिको बिस्तारित भेला आह्वान गर्नुपर्ने र तत्काल पार्टी केन्द्र पुनर्गठन गर्नुपर्ने हाम्रो निर्णय छ,’ पत्रमा भनिएको छ।
त्यस्तै प्रदेश पुनर्संरचना गर्नुपर्ने र प्रदेश समितिलाई सांगठनिक ढाँचा मात्र होइन स्वायत्तता दिनुपर्ने सुझाव दिइएको पनि पत्रमा उल्लेख छ।
सभापति रवि लामिछानेलाई नख्खु कारागारबाट निकाल्न हतार गरिएको ठहर सुदूरपश्चिम प्रदेश समितिले गरेको पत्रमा भनिएको छ।
‘पटक–पटक पार्टी सभापतीज्यूलाई सञ्चालन र सुझाव दिने अंगको अपरिपक्कता र सहानुभूति बटुल्ने चक्करका कारण पार्टी सभापति र समग्र पार्टीले हरेक मुद्दामा धोका खाएको छ। त्यसैको ज्वलन्त उदाहरण हालसालै नख्खु कारागारबाट सभापतिज्यूलाई बाहिर निकाल्न हतारिएर अपरिपक्क निर्णय गरी पार्टीका जिम्मेवार पदाधिकारी र केन्द्रीय सदस्यज्यूहरूलाई समेत झोस्ने कार्य गरिएको छ। यस्तो गलत उपाय अपनाउनुको प्रत्यक्ष असर ४० लाख बढी हस्ताक्षरमा सहभागी समर्थकको समर्थनमा ठेस पुगी पार्टीको साख गुम्नुका साथै बौद्धिक वर्गमा बहसको बिषय बन्न पुग्यो,’ निर्णयको जानकारी गराइएको पत्रमा भनिएको छ।
पार्टी पंक्ति निष्क्रिय जस्तै बन्न पुगेको बखत सुमना श्रेष्ठले पार्टी छाडेको भन्दै प्रश्न उठाइएको छ।
‘लोकतान्त्रिक दल भनिएता पनि केन्द्रीय निरंकुशता हाबी भइ लोकतन्त्रको उपहास हुन गई पुराना दलको जस्तै व्यक्ति पुज्ने प्रवृत्ति लागु हुन गएको आभास भएको र निरंकुशताले पार्टी नबन्ने, मपाईंको राजनीतिक अभ्यासको अन्त्य गरिनुपर्ने निष्कर्ष निकालियो,’ माथिल्लो कमिटीमा पठाइएको पत्रमा उल्लेख छ।
-1746009348.jpg)
