नेकपा (एमाले)का केन्द्रीय सदस्य पदम गिरीले एमालेको आडमा अराजकता निम्त्याउने छुट कसैमा नरहेको बताएका छन्।
संविधान दिवसका अवसरमा शुक्रबार आयोजित कार्यक्रममा बोल्दै उनले एमाले भन्दै तोडफोडमा उत्रिने जोकोही भए पनि निर्मम कारबाही गरिनुपर्ने बताएका हुन्।
‘तोडफोड आगजनी गर्ने एमाले हुँदै सक्दैन । एमालेको सदस्य हुने, एमाले हुँ भन्ने, एमालेको झण्डा बोक्ने । तर कांग्रेसको कार्यालय देख्यो भने जलाउँछ । माओवादीको पार्टी कार्यालय देख्यो भने आगो लगाउन पुग्छ । कुनै सार्वजनिक सम्पत्ति देख्यो भने जलाउँछ । भने त्यस्तो मान्छे एमाले हुन सक्दैन।’
एमालेको नाम लिँदै फटाइँ गर्नेलाई कारबाही गर्नुपर्ने उनले बताए ।
‘त्यसलाई खोजी खोजी निर्ममतापूर्वक कारबाही गरिनुपर्छ । त्यसलाई तत्काल पक्राउ गरी प्रहरी कार्यालयमा लगेर बुझाउन पर्छ।’
तोडफोड, आगजनी र विध्वंसलाई प्रशासनले पनि हेरोस भन्दै पूर्वमन्त्री गिरीले समाजमा अराजकता निम्त्याउन समूहलाई कारबाहीको दायरमा ल्याउन माग गरे।
‘यो विषय प्रशासनले पनि हेरोस् । जो जो संलग्न छन् तिनीहरूको कारबाही होस् । आगजनी गर्न हिँड्ने मान्छेलाई कारबाहीको दायरामा ल्याउने र कानूनी कारबाही गर्ने जिम्मेवारी प्रशासनले लिनुपर्छ,’ उनले भने ।
पार्टी कार्यालय, नेताका घर तथा सम्पत्ति जलाएर तर्साउन खोजिएको भए त्यो पूरा नहुने गिरीले बताए ।
‘मेरो पनि घर जलाए । लागेको हुनसक्छ । पार्टी कार्यालय जलाइयो घर जलाइयो यिनीहरूको मनोबल घट्छ र अब बाहिर निस्कँदैनन भन्ने सोचेका होलान् । तर त्यसो होइन । फेरि मजबुद हुँदै, संगठित हुँदै, पुनर्गठित हुँदै, एकताबद्ध हुँदै त्यसबाट शाहस बटुलेर अब एमाले निर्माणमा पार्टीका सबै पक्ष मिलेर फेरि उठ्दैछौं,' उनले भने।
-1746009348.jpg)
