भदौ २४ गते प्रदर्शनकारीहरूको आक्रमणबाट घाइते भएका नेपाली कांग्रेसका सभापति शेरबहादुर देउवा र तत्कालीन परराष्ट्र मन्त्री आरजु राणा देउवालाई उद्धार गरी काठमाडौंको शिवपुरी लगेको खुलेको छ।
बूढानीलकण्ठस्थित घरमै रहेका सभापति देउवा दम्पतीलाई उद्धार गर्न नेपाली सेनाको हेलिकप्टर पटक-पटक लगे पनि अवतरण गर्न सकेको थिएन।
प्रदर्शनकारीहरूको कुटपिटबाट घाइते भएका देउवा दम्पतीलाई उद्धार गर्न नेपाली सेनाको हेलिकप्टर हेलिकप्टर लगे पनि सुरूमा प्रदर्शनकारीहरूले अवतरण गर्न दिएका थिएनन्।
हेलिकप्टर जमिनको नजिकै दूरीमा आउन लाग्दा प्रदर्शनकारीहरूले ढुंगा, पानीका बोत्तल लगायत प्रहार गरेका थिए।
सभापति देउवा दम्पतीलाई प्रदर्शनकारीहरूले घरभित्रै पसेर लछारपछार गरी बाहिर ल्याएका थिए।
सभापति देउवा दम्पतीको गर्धन, ढाडलगायत ठाउँमा चोट छ। सिसा, धारिलो हतियार वा रड प्रहार गरी देउवा दम्पतीको शरिरमा चोट पुर्याएको देखिने देउवानिकट स्रोतले चिकित्सकहरूलाई उद्धृत गर्दै भनेका छन्।
प्रदर्शनकारी भदौ २४ गते ९ बजेदेखि नै बूढानीलकण्ठस्थित देउवा चोकमा भेला भइसकेका थिए। बिस्तारै यो भिड देउवा निवासतर्फ अघि बढेको थियो।
त्यसबेला परराष्ट्र मन्त्री रहेकी आरजु मन्त्री क्वार्टरमा नबसी बूढानीलकण्ठस्थित घरमै बसेकी थिइन्। आरजुका लागि र पूर्वप्रधानमन्त्री शेरबहादुर देउवाका लागि घरमै सुरक्षा व्यवस्था थियो।
तर घरमा सुरक्षार्थ खटाइएका प्रहरीले प्रदर्शनकारीहरूको भिडबीच सुरक्षा दिन सक्ने अवस्था थिएन।
त्यसैले भदौ २४ गते बिहान नेपाली सेनाको मेजरको नेतृत्वमा टोलीसमेत परिचालन गरिएको थियो। त्यसपछि कर्णेलसहित टोली पनि देउवा निवास पुगेको थियो।
तर त्यसबेलासम्म प्रदर्शनकारीहरूले देउवा दम्पतीमाथि आक्रमण र घरमा आगो झोसिसकेका थिए।
सेना, प्रहरी र केही प्रदर्शनकारीको सहयोगमा देउवा दम्पतीलाई घरदेखि उत्तरपूर्व रहेको खाली जग्गामा पुर्याइएको थियो। घरको कम्पाउण्डको पर्खालमा भर्याङ लगाएर काँडेतार झेल्दै देउवा दम्पतीलाई खाली जग्गामा लगिएको थियो।
हेलिकप्टर अवतरण गरी उद्धार गर्ने सेनाको तयारी थियो तर हेलिकप्टर पटक पटक आए पनि ल्याण्ड गर्न सकेको थिएन।
देउवा दम्पतीलाई उद्धार गर्न हेलिकप्टर आएका बेला प्रदर्शनकारीहरूले हो-हल्ला र ढुंगा हानिरहेका थिए।
देउवा दम्पतीको घाटी, गर्धनलगायत ठाउँमा रगत बगेपछि मेडिकल टिमले प्राथमिक उपचार त्यहीँ गरेको थियो।
देउवा दम्पतीलाई खुला जग्गामा ल्याएर राख्दा पनि ढुंगा प्रहार भइरहेको थियो। सुरक्षाकर्मीले देउवा दम्पतीलाई जोगाउन जस्तापाताले ढाकेर राखेका थिए।
नेपाली सेनाले प्रदर्शनकारीलाई केही परसम्म हटाएको थियो। तर पनि हेलिकप्टर ल्याण्ड गर्न सकेन। त्यसपछि जस्तापाताले छेक्दै देउवा दम्पतीलाई गाडीमा राखेर नेपाली सेनाले उद्धार गरेको थियो।
‘तीन पटकसम्म हेलिकप्टर आए पनि ल्याण्ड नै गर्न सकेन। त्यसबेला पनि ढुंगा प्रहार भइरहेको थियो, जस्तापाताले छेकेर अलि पर पुर्याएर गाडीमा राखेर उहाँहरूको उद्धार गरिएको हो,’ स्रोतले भन्यो, ‘मेडिकल टिमसहित नेपाली सेनाले गाडीमा राखेर शिवपुरी पुर्याएको थियो, त्यस दिन सडकमा प्रदर्शनकारीहरू जतासुकै भएकोले देउवा दम्पतीलाई उपचारका लागि काठमाडौंका अस्पताल ल्याउने अवस्था नै थिएन।’
सभापति देउवा दम्पतीको शिवपुरीस्थित नेपाली सेनाको स्टाफ कलेजमा राखेर उपचार भइरहेको छ। ‘अझै एक साताजति उहाँहरू त्यहीँ रहने देखिन्छ,’ देउवानिकट स्रोतले भन्यो, ‘नेपाली सेनाको चिकित्सकहरूले उपचार गराइरहेका छन्।’
सभापति देउवा दम्पतीको स्वास्थ्य अवस्था सुधारोन्मुख छ। आफ्ना परिवारका सदस्य र केही निकट आफन्तलाई मात्रै भेट्न दिएको अवस्था छ, कांग्रेसका नेताहरूले भेट्न पाएका छैनन्, फोनमा भने कुराकानी गरिराखेका छन्।
सेनाले तत्कालीन प्रधानमन्त्री केपी शर्मा ओली, मन्त्रीहरू, कांग्रेस सभापति देउवा दम्पती, माओवादी अध्यक्ष पुष्पकमल दाहाल 'प्रचण्ड', एकीकृत समाजवादी अध्यक्ष माधवकुमार नेपाल लगायतलाई पनि शिवपुरीमै लगेर राखेको थियो।
अरू नेता र मन्त्रीहरू त्यहाँबाट बाहिर आए पनि निवर्तमान प्रधानमन्त्री ओली र देउवा दम्पतीलगायत केही अझै शिवपुरीमै छन्।
भदौ २३ र २४ गते जेनजी प्रदर्शन भएको थियो। प्रदर्शनमा परेर अहिलेसम्म ७२ जनाको मृत्यु भएको छ। सिंहदरबार र बाहिर रहेका सरकारी कार्यालयहरू, पार्टी कार्यालयहरू र नेताका घरमा आगजनी भएका छन्।
केपी शर्मा ओलीले पदबाट राजीनामा दिएपछि पूर्वप्रधान न्यायाधीश सुशीला कार्की अन्तरिम प्रधानमन्त्री नियुक्त भएकी छन्। अहिलेसम्म ३ जना मन्त्री नियुक्त भएका छन्।
जेनजी प्रदर्शनपछि जनधनको क्षति भएको थियो भने नेपाली सेनाको कमाण्डमा सुरक्षा दिइएको थियो। कर्फ्यू र निषेधाज्ञा लगाएर सेनाले सुरक्षा दिएको थियो भने अन्तरिम प्रधानमन्त्री कार्की नियुक्त भएपछि जनजीवन बिस्तारै सामान्य बन्दै गएको छ।
-1746009348.jpg)
