नेपाली कांग्रेसका केन्द्रीय सदस्य नैनसिंह महरले वर्तमान राजनीति संकटको समाधान संवधान सभाले निर्माण गरेको संविधान भित्रबाट खोजिनु पर्ने बताएका छन्।
उनले देशमा व्याप्त भ्रष्टाचार र शोषणविरुद्ध सुरू भएको जेन्जी आन्दोलनको मुख्य माग यसै संविधानभित्र रहेर पूरा गर्न सकिने बताए। विषम परिस्थितिमा सबैलाई संयमित र सुरक्षित रहँदै समाजमा अमनचयन कायम गर्ने कार्यमा क्रियाशील रहन उनको अनुरोध छ।
जनचेतना जगाउने उद्देश्यले सुरू भएको आन्दोलनले गलत मोड लिँदा देशले ठूलो मूल्य चुकाउनुपरेको उनको भनाइ छ। 'यस क्रममा दर्जनौंले ज्यान गुमाएका छन् भने खर्बौंको धनसम्पत्ति नष्ट भएको छ,' उनले भने।
सरकारी अकर्मण्यताका कारण डेढ दर्जनभन्दा बढी युवाहरूको ज्यान जानु बर्बरतापूर्ण कार्य भएको भन्दै उनले खेद प्रकट गरे।
पूर्वप्रधानमन्त्री तथा कांग्रेस सभापति शेरबहादुर देउवालगायत नेता र सामाजिक व्यक्तित्वहरूमाथि भएको आक्रमण लोकतान्त्रिक आचरण विरूद्धको निन्दनीय कार्य भएको उनको भनाइ छ।
‘लोकतन्त्रिक प्रणाली विश्वकै उच्चतम प्रणाली हो र यसै प्रणालीअन्तर्गत अहिलेको संविधान बनेको छ,’ महरले भने, ‘यस विषम परिस्थितिको निकास पनि अहिलेको संविधानभित्रै खोजिनुपर्छ।’
-1746009348.jpg)
