कोमल वलीले रेडियो नेपालमा समाचार वाचन र गीत गाएर किनेको जग्गामा होटल खोलेको र त्यो हालैको आन्दोलनमा खरानी भएको बताएकी छन्।
‘यो होटल मेरो मात्र नभई गाउँको रगत–पसिनासँग जोडिएको थियो। बीस वर्षअघि रेडियो नेपालमा समाचार वाचन र गीत गाएर कमाएको पारिश्रमिकले किनेको जग्गामा आज मेरो पसिना र ऋणसँगै उभिएको सपना खरानी बनाइयो,’ बिहीबार सामाजिक सञ्जाल फेसबकुमा उनले लेखेकी छन्, ‘हामी बामे सर्दै थियौं तर नियतवश मेरो पसिना, आँसु र सपना खरानी बनाइयो।’
उनले सधैं साथ दिएको उमेर समूह जेन–जीको आन्दोलनको आवरणमा आफ्नो सपना, पसिना र आँसुमाथि खरानी बनाइएको पनि बताइन्।
‘सेवामुलक सानो होटल सञ्चालन गरेर गाउँलाई रोजगारी दिने, स्थानीय उत्पादनलाई बजारसम्म पुर्यउने, सबैलाई सँगसँगै समृद्धिको बाटोमा अघि बढाउने सपना थियो मेरो कोमल होटल खोज्दा। म तुलसीपुरका पाँचतारे होटल वा अन्य होटलसँग प्रतिस्पर्धा गर्ने होइन तर प्राकृतिक सौन्दर्यले गर्दा आम जनताको नजरमा परेका रहेछौं,’ उनले भनेकी छन्।
उनले आफू गीत गाएर रेडियो नेपालमा पुरस्कृत भएको र समाचार वाचनमा आदर्श बन्ने अवसर पाएको पनि बताएकी छन्।
’देश–विदेशले मेरो स्वरमार्फत् नेपाललाई चिने। करिब १८ वर्ष रेडियो नेपालमा सेवा गरेर राजनीति रोजेँ, सेवामुखी जीवन बिताउने संकल्पसहित २०७४ सालमा राष्ट्रिय सभामा सांसद निर्वाचित भई चार वर्षे कार्यकालभर सकेसम्म सबैको सेवा गरेँ,’ उनले भनिन्।
‘जेन–जीको क्रान्ति र परिवर्तनको नाममा आएको युवाको ऊर्जामाथि गर्व गर्छु, तर सोही नाममा अरूले गरेको यो काम के साँच्चै आन्दोलनको हिस्सा हो? के मेरो घर ध्वस्त पार्नु र होटलमा आगो लगाउनु जेन–जीको क्रान्ति हो? ४० जना स्थानीयले पाएको रोजगारी खोस्नु परिवर्तनको मार्ग हो? पानीको सेवा दिईरहेका ईसर ट्रक र टाटा योद्धा गाडी जलाउँदा अलिकति हात काँपेनन्?,’ उनको प्रश्न छ।
-1746009348.jpg)
