नेकपा एमालेले अबको राजनीतिक निकास संविधान सम्मत र लोकतान्त्रिक विधिबाट खोज्न आग्रह गर्दै त्यसको पहल गर्न राष्ट्रपतिलाई आग्रह गरेको छ।
पार्टीका महासचिव शंकर पोखरेल र उपमहासचिव प्रदीप ज्ञवालीले संयुक्त आह्वान जारी गर्दै सार्थक संवादमार्फत निकास खोजिनुपर्ने बताएका छन्।
'प्रधानमन्त्रीको राजीनामापछिको राजनीतिक निकास संविधान सम्मत र लोकतान्त्रिक विधिबाट खोजिनुपर्छ,' पोखरेल र ज्ञवालीले भनेका छन्, 'सार्थक संवाद सुरू गर्न एवं परिणाममुखी संवादकै माध्यमबाट सुशासन, सहज सेवा प्रवाह र तीव्र विकासको आकांक्षा लगायतका युवा पुस्ताका मागलाई संविधान सम्मत रूपमा सम्बोधन गर्न आवश्यक पहलका लागि सम्माननीय राष्ट्रपतिज्यूलाई ध्यानाकर्षण गराउँछौं।'
लोकतान्त्रिक गणतन्त्र र बहुदलीय प्रतिस्पर्धात्मक प्रणालीलाई कुनै पनि अर्थमा कमजोर गर्नु नमिल्ने उल्लेख गर्दै उनीहरूले समाधानका प्रत्येक प्रयासले लोकतन्त्रलाई थप सुदृढ गर्नुपर्ने बताएका छन्।
दुवै नेताले अहिलेको असामान्य स्थितिको लाभ उठाउँदै देशभरि भइरहेको लुटपाट, आगजनी र तोडफोड नियन्त्रण गर्न एवं जनताको जिउधनको सुरक्षा प्रभावकारी रूपमा गर्न नेपाली सेना लगायत सबै सुरक्षा अंगहरूलाई आग्रह पनि गरेका छन्।
'भ्रष्टाचारको विरोध लगायत विभिन्न माग राखेर सञ्चालित जेनजी पुस्ताको प्रदर्शन क्रममा प्रहरीको गोली प्रहारबाट भएको युवाहरूको दुःखद निधन र घाइते भएको घटनाले सिंगो मुलुक मर्माहत बनेको छ,' संयुक्त आह्वानमा भनिएको छ, 'मारिनु हुने सबैप्रति हामी पुनः श्रद्धाञ्जली अर्पण गर्दै घाइतेको शीघ्र स्वास्थ्य लाभको कामना गर्छौं। सन्तान वियोगका पीडामा रहनुभएका परिवारजनमा गहिरो समवेदना व्यक्त गर्छौं।'
दुवै नेताहरूले घटनाको निष्पक्ष छानबिन हुनुपर्ने र दोषीमाथि कानुन बमोजिम कारबाही हुनुपर्ने पनि माग गरेका छन्।
'त्यस पीडाको घाउ ओभाउन नपाउँदै हिजो देशैभरि भएका आगजनी, तोडफोड, हिँसा र लुटपाटका घटनाले मुलुक पुनः स्तब्ध भएको छ,' उनीहरूले भनेका छन्, ' संघीय संसद भवन, राष्ट्रपति भवन, ऐतिहासिक सिंहदरबार, सर्वोच्च अदालत, महान्यायाधिवक्ताको कार्यालय, प्रहरी कार्यालय लगायत सयौं संरचना ध्वस्त भएका छन्। बहुमूल्य र दुर्लभ अभिलेख, दस्तावेज र लिखतहरू जलेर नष्ट भएका छन्। होटल, डिपार्टमेन्टल स्टोर, केबुल कार, गाडीका सोरूम, बैंक लगायत सार्वजनिक र निजी सम्पत्तिमा खर्बौंको नोक्सानी भएको छ। जेलबाट गम्भीर कसुरमा दोषी साबित भएका सहित हजारौं कैदीबन्दी बाहिरिएका छन्। राजनीतिक दलका नेता कार्यकर्ता तथा कार्यालयहरू निशाना बनाइएका छन्। विकासका दृष्टिले मुलुकलाई दशकौं पछाडि धकेल्ने यी घटना क्रमबाट सिंगो समाज निकै आहत भएको छ।'
पोखरेल र ज्ञवालीले प्रदर्शन शान्तिपूर्ण रहने आयोजकहरूको पूर्वघोषणा विपरीत र यसमा कुनै संलग्नता नरहेको उनीहरूको स्पष्टोक्तिका बाबजुद यस्ता विध्वंसात्मक र विनाशकारी घटना कसबाट र कसरी भए, यसको यथार्थ छानबिन हुनुपर्ने बताएका छन्।
'यस क्रममा राज्यका सुरक्षा निकायहरूको भूमिकाको पनि समीक्षा हुनुपर्छ,' उनीहरूले भनेका छन्।
अहिलेको विषम अवस्थामा पार्टी पंक्तिलाई अविचलित, एकताबद्ध र भविष्यप्रति आशावादी भएर अगाडि बढ्न पनि उनीहरूले आह्वान गरेका छन्।
'हामीहरू निरंकुशतन्त्र, सशस्त्र द्वन्द्व, सामाजिक विद्वेषको चरम अवस्था र प्राकृतिक एवं मानव–निर्मित विपत्ति जस्ता असामान्य चुनौतीसँग जुझ्दै र तिनीहरूमाथि विजय हासिल गर्दै यस विन्दुसम्म आइपुगेका हौं,' उनीहरूले भनेका छन्, 'यो प्रतिकूल अवस्था सधैं रहने छैन। अवश्य बदलिएर जानेछ। संकटको यस घडीमा सबै कमरेडहरूलाई नियमित सम्पर्कमा रहन, समस्याको सामूहिक समाधानको प्रयास गर्न, प्रशासनसँगको समन्वयमा सार्वजनिक तथा निजी सम्पत्तिको रक्षा गर्न, शान्ति सुरक्षा कायम राख्न र जनतालाई परेको पीरमर्कामा आवश्यक राहत प्रदान गर्न आग्रह गर्छौं।'
उनीहरूले थप भनेका छन्, 'समग्र स्थितिको वस्तुनिष्ठ विश्लेषण र यस क्रममा हाम्रा कुनै कमी रहेका भए तिनको पनि समीक्षा उपयुक्त समयमा हुने नै छ। तर यति बेला सम्हालिनु, एकताबद्ध हुनु र दृढ विश्वासका साथ अगाडि बढ्नु बढी महत्वपूर्ण छ। राष्ट्र, लोकतन्त्र र कम्युनिस्ट आन्दोलन सबैका सामु गम्भीर चुनौती उत्पन्न भएको प्रतिकूल अवस्थामा यिनको रक्षाका लागि कमरेडहरूको रचनात्मक भूमिका रहने छ भन्ने विश्वास लिएका छौं।'
-ink-1756887187.jpeg)
-1746009348.jpg)
