सरकारका प्रवक्तासमेत रहेका सञ्चार तथा सूचना प्रविधि मन्त्री पृथ्वीसुब्बा गुरूङले जेनजीका नाममा अराजकतावादी र प्रतिगमनकारीको घुसपैठ भएको टिप्पणी गरेका छन्।
सोमबार अपराह्न सेतोपाटीसँग संक्षिप्त कुराकानी गर्दै मन्त्री गुरूङले एजेन्डाभन्दा बाहिर गएर संवेदनशील क्षेत्रमा प्रदर्शन र आगजनी हुन पुगेको बताए।
‘जेनजीको माग भ्रष्टाचारको छानबिन र सामाजिक सञ्जाल पुन: सञ्चालन थियो, तर संसद भवन र सिंहदरबारजस्ता प्रमुख सरकारी केन्द्रमा आगजनी र आक्रमण गरियो,’ उनले भने, ‘त्यसपछि दु:खद घटना हुन पुग्यो।’
उनले प्रदर्शनमा धेरै जनाको मृत्यु हुनु दु:खद भएको बताए।
‘सत्ता कब्जा गर्ने नियतले यो प्रदर्शनमा प्रतिगामी र अराजकतावादीको घुसपैठ भयो,’ उनले भने, ‘थप कुरा गृहमन्त्रीजीले पनि भन्नुहोला, आज साँझ मन्त्रिपरिषद बैठक पनि छ, थप कुरा आउला।’
उनले अहिलेसम्म सामाजिक सञ्जाल बन्दका कारण कुनै देशमा यस्तो घटना नभएको दाबी पनि गरे।
सामाजिक सञ्जाल तत्काल पुन: सञ्चालन गर्नेबारे कुनै निर्णय नभएको उनको भनाइ छ।
‘हामीले सामाजिक सञ्जाल दर्ता गर्न आउ भनेको हो, पटक पटक प्रयास गर्दा पनि मेटाले अटेरी गर्यो,’ उनले भने, ‘हामीले त्यही भएर दर्ता गर्न नआएका सामाजिक सञ्जाल नचल्ने बनाएको हो। यो राष्ट्रियताको सवाल पनि हो।’
जेनजीको काठमाडौं प्रदर्शनमा अहिलेसम्म १४ जनाको मृत्यु भइसकेको छ।
-1746009348.jpg)
