इन्द्रजात्राको रौनक, हनुमानढोकामा उच्च पदस्थहरूको उपस्थिति (तस्बिरहरू)

सेतोपाटी संवाददाता

काठमाडौं, भदौ २१

इन्द्रजात्रामा सहभागी हुन राष्ट्रपति, प्रधानमन्त्रीदेखि उच्च पदस्थ व्यक्तिहरू बसन्तपुर पुगेका छन्।

राष्ट्रपति रामचन्द्र पौडेल, प्रधानमन्त्री केपी शर्मा ओली, सभामुख देवराज घिमिरे लगायत उच्च पदस्थहरू शनिबार अपराह्न बसन्तपुर पुगेका हुन्।

काठमाडौं महानगरपालिकाका मेयर बालेन शाह पनि इन्द्रजात्रामा सहभागी भएका छन्।

भाद्र शुक्ल द्वादशीका दिन हनुमानढोका अगाडि धार्मिक विधिपूर्वक इन्द्रध्वजासहितको लिङ्गो ठड्याइएपछि प्रारम्भ हुने यो जात्रा विभिन्न प्रकारका नाचगान, रथयात्रा र देवीदेवताको पूजाआजा गरी आठदिनसम्म मनाउने प्रचलन छ।

आजको दिन मुख्य रूपमा मनाइने इन्द्रजात्रा पर्वमा राष्ट्रपतिबाट हनुमानढोकास्थित गद्दी बैठकमा जीवित देवीका रूपमा रहेका श्री गणेश, श्री भैरव र श्री कुमारीको रथयात्रा नजर गर्ने परम्परा छ।

इन्द्रध्वजाको लिङ्गो ठड्याएपछि सुरू भएको जात्राभरि भक्कुनाच, महाकालीनाच, लाखेनाच, दशअवतार तथा देवराज इन्द्रको वाहन ऐरावत हात्तीको प्रतीकका रूपमा पुलुकिसी नाच नचाउने गरिन्छ।

यस उपलक्ष्यमा आज उपत्यकाको पश्चिममा पर्ने दहचोकस्थित इन्द्रदहमा रातभर जाग्राम बसी भाद्र शुक्ल पूर्णिमाका दिन आइतबार स्नान गरेर मेला भर्न भक्तजनहरूको घुइँचो लाग्छ।

तस्बिरहरूः

indrajatra-(2)-1757156757.jpg