नेकपा (माओवादी केन्द्र) का उपमहासचिव जनार्दन शर्मालाई पार्टी संस्थापन निकटहरूले पछिल्लो समय ‘कतैबाट परिचालित’ बनेको आरोप लगाइरहेका छन्।
खासगरी सामाजिक सञ्जाल फेसबुक लगायतमा यस्ता अभिव्यक्तिहरू धेरै देखिन्छ।
प्रधानमन्त्रीसमेत रहेका नेकपा (एमाले) का अध्यक्ष केपी शर्मा ओलीसँगको ‘क्रप’ गरिएको फोटो भाइरल बनाएर उनलाई ‘ओलीबाटै परिचालित रहेको’ प्रचार समेत भएको थियो।
यी सबै हल्लाहरूबारे उपमहासचिव शर्माले मुख खोलेका छन्।
उनले ‘आफूविरुद्ध यस्तो भ्रम मुख्य ठाउँबाटै हालिएको’ भन्दै फेरि पनि अध्यक्ष पुष्पकमल दाहाल 'प्रचण्ड'तिरै संकेत गरेका छन्।
सोमबार राति कान्तिपुर टेलिभिजनमा प्रसारण भएको कार्यक्रम ‘फायरसाइड’ मा पत्रकार रूपेश श्रेष्ठसँगको अन्तर्वार्तामा उपमहासचिव शर्माले यस्तो लेख्नेहरूको दोष नभएको बरू भ्रम चाहिँ मुख्य ठाउँबाटै हालिएको बताएका हुन्।
जनार्दन शर्मा केपी शर्मा ओलीबाट परिचालित भएका हुन् कि भनेर आशंका गर्दै एक व्यक्तिले लेखेको प्रसंग पत्रकार श्रेष्ठले उनलाई सुनाउँछन्। जबाफमा जनार्दन भन्छन् ‘यो कुरा लेख्नेको होइन, मुख्य ठाउँबाटै भ्रम हालिएको छ।’
मुख्य ठाउँ भनेको कहाँ भन्ने प्रश्नको उत्तर दिन भने शर्माले इन्कार गरेका छन्।
‘अहिले त्यो कुरा छोड्नुस्,’ जनार्दनले भनेका छन्, ‘मुख्य ठाउँबाट के भ्रम हालिएको छ भने, मुख्य ठाउँ त विभिन्न होला निज!, यो यहाँबाट, उहाँबाट विदेशी शक्तिबाट भनिएको छ। प्रभाकर कसैको पछि छैन। पार्टी बलियो बनाउने पक्षमा छ।’
आफूले पार्टीको लोकतान्त्रिकीकरण र रूपान्तरणको मुद्दा लगातार उठाइरहेको र त्यो बहसलाई ओझेल पार्न यस्ता भ्रमहरू छरिएको उनले बताए। ‘पार्टी फुटाउँदै छ भनेर मैले भनेको हो?,’ उनले भनेका छन् ‘नेताहरूले भनेका हुन्।’
अध्यक्ष पुष्पकमल दाहाल 'प्रचण्ड'विरूद्ध निरन्तर आलोचनात्मक रूपमा प्रस्तुत हुँदै आएका शर्मालाई प्रचण्डले पार्टी छाडेर जानु भनेर भनिसकेका छन्। उनी पार्टी फुटाउने तयारीमा रहेको, प्रतिक्रियावादी र दलालहरूको उक्साहटमा लागेको भनेर प्रचण्डले बारम्बार भनेका छन्।
आफू पार्टी छाडेर जाने पक्षमा हुँदै नभएको दोहोर्याउँदै जनार्दनले भने, ‘आज पार्टीको साख खस्केको छ। म त्यो साख फेरि माथि उठाऔं भन्दै छु। पार्टीभित्र लोकतान्त्रिकीकरण गरौं। निर्वाचनमार्फत चुनिएर आउने विधि बनाऔं। त्यसबाट उहाँ (प्रचण्ड) नै आउने हो।’
लामो समयदेखि पार्टी नेतृत्व नछाडेको भन्ने आरोप प्रचण्डमाथि रहेको र आफ्नो प्रस्तावले उनैलाई सहयोग पुग्ने जनार्दनको दाबी छ।
‘कति वर्षदेखि (पार्टी नेतृत्व) मा रहेको भन्ने आरोप उहाँमाथि पनि छ त,’, जनार्दनले अन्तर्वार्तामा भनेका छन्, ‘पार्टीलाई अझै सशक्त र विधिबाट अघि लैजाने कुराले त मेरै नेतालाई मद्दत पुग्छ त ! उहाँलाई नै सहयोग पुग्छ त!’
आफूले पहिलेदेखि नै पार्टीको संगठनात्मक कामको जिम्मा युवा पङ्क्तिलाई दिन प्रस्ताव गरेको पनि उनले बताए।
‘त्यो फेरि मलाई दिनुस् भनेको होइन, मैले मागेकै छैन,’ उनले भने ‘संगठनात्मक काम युवालाई दिऊँ, राजनीतिक वैचारिक कामहरू अध्यक्षले गर्नुहोस्, सरकार चलाउन परे प्रधानमन्त्री बन्नुहोस् भनेको हुँ। अब पार्टी पुनःनिर्माणका लागि फरक ढङ्गले अघि नबढी हुँदैन भनेको हुँ।’
यसो भनिरहँदा कतिपयले नबुझेर र आफूले पनि बुझाउन नसक्दा अध्यक्षविरोधी गतिविधि गरेको भनेर प्रचार भएको उनको भनाइ थियो।
उपमहासचिव शर्माले पार्टीको केन्द्रीय कमिटी बैठकले नै असारदेखि ६ महिनाभित्र महाधिवेशन आयोजना गर्ने निर्णय गरेको र त्यो कार्यान्वयन हुनैपर्ने पनि बताएका छन्।
‘केन्द्रीय कमिटीले असारदेखि ६ महिनाभित्र महाधिवेशन गर्ने भनेको छ, त्यो भनेको मंसिरभित्र हो,’ उनले भनेका छन्, ‘तर, त्यो दिशामा पार्टी अगाडि बढिराखेको छैन। पार्टीभित्र तमाम समस्याहरू छन्। ती सबैको छिनोफानो महाधिवेशनबाटै हुने हो। तलदेखि आएका कार्यकर्ताहरूको विचार, बहस र छलफलले नयाँ निचोड आउँछ। जनतामा अब कसरी जाने भन्ने टुङ्गो पनि महाधिवेशनले नै लगाउँछ।’
पार्टी महाधिवेशनतिर अघि नबढ्नुको कारण आफूलाई थाहा नभएको उल्लेख गर्दै जनार्दनले थपेका छन्, ‘निर्णय गर्ने कार्यान्वयन नगर्ने समस्या छ। म अहिले नै नियत नै हो किन भनिहालुँ तर महाधिवेशनतिर लैजाने प्रयत्न भइरहेको छ।’
सरकारसँग माओवादीले गरेको दुई बुँदे सहमतिले पार्टीलाई डिफेन्सिभ बनाएको उल्लेख गर्दै जनार्दनले यस्ता गल्तीहरू हुँदै आएको माओवादी इतिहास रहेको बताएका छन्।
‘यस्ता गल्तीहरू हामीबाट बेला बेला हुँदै आएका छन्,’ उनले भनेका छन्।
आफू माओवादीरूपी घर बलियो तुल्याउन लागिरहेको दाबी पनि उनले गरेका छन्।
‘म अध्यक्ष हटाउन होइन, उहाँको भूमिका फेर्न लागेको हुँ,’ उनले भने ‘घर भत्केको छ। भूकम्पले चर्काएको छ। मक्काएको छ। यसलाई रेट्रोफिटिङ गरेर बलियो बनाऔं भनिरहेको छु। त्यसो गर्दा घरमा बा त फेरिँदैन नि। भूमिका कसले के गर्ने, भन्ने हो। भूमिका फेरौं भन्ने हो।’
पार्टीको वैचारिक गन्तव्य के हो, संसदमा कस्तो भूमिका गर्ने, जनतामाझ के भनेर जाने, सरकारमा जाँदा किन जाने भन्ने विषय बहसमार्फत टुङ्गो लगाऔं भनेर आफूले भनिरहेको उनको दाबी छ।
पछिल्लो समय नेकपाका नेत्रविक्रम चन्द विप्लव, एकीकृत समाजवादीका महासचिव घनश्याम भूसालहरूसँग बाक्लिएको भेटघाट, छलफलबारे सोधिएको प्रश्नमा जनार्दनले पार्टी निर्णयअनुसार नै आफू अघि बढेको बताएका छन्।
‘स्थायी कमिटीले विप्लव र माधवजीहरूसँग एकता गर्ने भनेर निर्णय गरेको छ,’ उनले भने ‘मैले उहाँहरूसित गर्ने छलफल त्यसैको आधार हो।’ उनले बृहत् वाम एकतामार्फत समाजवादी केन्द्र बनाउनुपर्ने पनि बताएका छन्।
1626183247.jpg)
-1756794700.JPG)
-1746009348.jpg)
